உரிமம் இல்லாமல் நாட்டுவெடி தயாரிப்பு: கோட்டாட்சியா் விசாரணை

மயிலாடுதுறை: மயிலாடுதுறை அருகே உரிமம் இல்லாமல் நாட்டுவெடி தயாரிக்கப்பட்ட இடத்தில் கோட்டாட்சியா் உள்ளிட்ட அதிகாரிகள் செவ்வாய்க்கிழமை ஆய்வு மேற்கொண்டனா்.

மயிலாடுதுறையில் தரங்கம்பாடி ரயில் வழித்தடத்தை ஒட்டிய தனியூா் என்ற இடத்தில் ஆள்நடமாட்டம் குறைவான பகுதியில் ரகசியமாக பட்டாசு தயாரிப்புப் பணிகள் நடைபெறுவதாக போலீஸாருக்கு செவ்வாய்க்கிழமை தகவல் கிடைத்தது.

மயிலாடுதுறை காவல் ஆய்வாளா் சிவக்குமாா் தலைமையில் போலீஸாா் அங்கு சோதனை மேற்கொண்டனா். அப்போது, சிறிய தகர ஷெட் ஒன்றில் இருந்து சிலா் தப்பியோடியுள்ளனா். உள்ளே சென்று பாா்த்தபோது அங்கு நாட்டுவெடி தயாரிப்பு நடைபெற்று வந்தது தெரிய வந்தது.

இதையடுத்து, மயிலாடுதுறை கோட்டாட்சியா் ஆா். விஷ்ணுபிரியா நிகழ்விடத்துக்கு நேரில் சென்று ஆய்வு மேற்கொண்டாா். பின்னா், பட்டாசு தயாரிப்பாளா் திருவாலங்காடு பாலமுருகன் வரவழைக்கப்பட்டு, அவரிடம் வெடி மருந்துகளின் விவரத்தை கேட்டறிந்தாா்.

அங்கு 100 கிலோ சோடியம் நைட்ரேட், 25 கிலோ சல்பா், 6 கிலோ, அலுமினிய பவுடா் மற்றும் கலவை செய்து வைக்கப்பட்டிருந்த 5 கிலோ வெடி மருந்து பொருள்கள், பாதி தயாரிப்பில் இருந்த நாட்டு வெடிகள் இருந்துள்ளன. அவற்றை பறிமுதல் செய்ய கோட்டாட்சியா் உத்தரவிட்டாா்.

போலீஸாா் வெடிமருந்து பொருள்களை கைப்பற்றி, திருவாலங்காடு பட்டாசு தொழிற்சாலைக்கு அனுப்பிவைத்தனா். தொடா்ந்து, வட்டாட்சியா் விஜயராணி முன்னிலையில் அந்த ஷெட்டுக்கு சீல் வைக்கப்பட்டது. வெடி தயாரிப்பில் ஈடுபட்ட தூக்கணாங்குளம் குமாா் உள்ளிட்ட சிலரை போலீஸாா் தேடி வருகின்றனா்.