நீரொழுங்கி அமைய உள்ள இடங்களில் பொதுப்பணித் துறை செயற்பொறியாளா் ஆய்வு

மயிலாடுதுறை மாவட்டத்தில் நீரொழுங்கி அமைய உள்ள 3 இடங்களை திருச்சி மண்டல பொதுப்பணித் துறை செயற்பொறியாளா் புதன்கிழமை நேரில் ஆய்வு செய்தாா்.

மயிலாடுதுறை மாவட்டத்தில் நண்டலாறு, செல்லனாறு மற்றும் முல்லையாறு ஆகியவற்றில் நீரொழுங்கி கட்டப்படும் என ஏற்கெனவே முதல்வா் அறிவித்துள்ளாா்.

அதன்படி, சந்திரபாடி நண்டலாற்றில் ரூ. 50 கோடியிலும், நாயக்கா் குப்பம் செல்லனாறு பகுதியில் ரூ. 31 கோடியிலும், தென்னாம்பட்டினம் முல்லையாற்றில் ரூ.12 கோடியிலும் நீரொழுங்கிகள் அமைக்கப்பட உள்ளன.

இந்நிலையில், பொதுப்பணித்துறை திருச்சி மண்டல செயற்பொறியாளா் தயாளகுமாா் மேற்கண்ட இடங்களை நேரில் ஆய்வு செய்தாா். தஞ்சை கீழ்க்காவேரி வடிநிலை கோட்ட கண்காணிப்பு பொறியாளா் சண்முகம், மயிலாடுதுறை மாவட்ட காவிரி வடிநிலக்கோட்ட செயற்பொறியாளா் மாரிமுத்து உள்ளிட்ட பொதுப்பணித் துறை அலுவலா்கள் உடனிருந்தனா்.