மூதாட்டியைத் தாக்கி 13 பவுன் பறிப்பு: 3 பேர் கைது

திருவாரூர் மாவட்டம், மன்னார்குடி அருகே வீட்டில் தனியாக இருந்த மூதாட்டியைத் தாக்கி, 13 பவுன் நகையைப் பறித்துச் சென்ற வழக்கில், 3 பேர் வியாழக்கிழமை கைது செய்யப்பட்டனர்.
கண்டிதம்பேட்டை கீழத்தெருவைச் சேர்ந்த முருகையன் மனைவி சரோஜா (70). முருகையன் இறந்துவிட்டார். இவர்களது 3 மகன்கள் மற்றும் மகள் திருமணமாகி வெளிநாட்டில் குடும்பத்துடன் வசித்து வருகின்றனர். சரோஜா மட்டும் கண்டிதம்பேட்டையில் உள்ள பூர்வீக வீட்டில் வசித்து வருகிறார்.
இந்நிலையில், கடந்த அக். 27-ஆம் தேதி சரோஜா வீட்டுக்கு காரில் வந்த மூவர், அவரை உருட்டுக்கட்டையால் தாக்கி, அவர் அணிந்திருந்த சங்கிலி, மோதிரம், வளையல் உள்ளிட்ட 13 பவுன் நகைகளைத் திருடிக்கொண்டு தப்பியோடினர்.
இதுதொடர்பாக தனிப்படை போலீஸார் விசாரணை நடத்தி, கண்டிதம்பேட்டை கீழத்தெருவைச் சேர்ந்த ப.திருமுருகனை (33) கைது செய்தனர். விசாரணையில், ஏற்கெனவே திருட்டு வழக்கில் அவர் கைது செய்யப்பட்டு சிறையில் இருந்தபோது, அங்கு அறிமுகமான மன்னார்குடி கீழப்பாலம் அ. எக்பர்ட் (43), தூத்துக்குடி வள்ளிவிளையைச் சேர்ந்த ரா. வேல்முருகன் (26) ஆகியோருடன் சேர்ந்து, சரோஜாவை தாக்கி நகைகளை திருடியது தெரியவந்தது.
இதைத்தொடர்ந்து, மூவரையும் கைது செய்த போலீஸார், அவர்களிடமிருந்து 13 பவுன் நகையையும், சம்பவத்துக்குப் பயன்படுத்தப்பட்ட வேல்முருகனுக்குச் சொந்தமான காரையும் பறிமுதல் செய்தனர்.