தயார் நிலையில் ஜனக்புரி மேற்கு - கால்காஜி மந்திர் மெட்ரோ ரயில் வழித்தடம்

தில்லியில் ஜனக்புரி மேற்கு- கால்காஜி மந்திர் இடையேயான மெட்ரோ ரயில் வழித்தடம் (மெஜந்தா) வரும் மே 28-ம் தேதி திறக்கப்படவுள்ளது.
தில்லியில் ஏற்கெனவே இரண்டு கட்டங்களாக மெட்ரோ ரயில்வே திட்டப் பணிகள் நடைபெற்று முடிவடைந்தன. இதையடுத்து, தலைநகரின் பல்வேறு பகுதிகளுக்கும் மெட்ரோ ரயில்கள் இயக்கப்பட்டு வருகின்றன. தற்போது, மூன்றாம் கட்ட மெட்ரோ ரயில்வே திட்டப் பணிகள் பல்வேறு பகுதிகளில் நடைபெற்று வருகின்றன.
இதன் ஒரு பகுதியாக, ஜனக்புரி மேற்கு மற்றும் கால்காஜி மந்திர் இடையேயான 24.82 கிலோ மீட்டர் தொலைவுக்கு ரயில்வே தண்டவாளம் அமைக்கும் பணிகள் முடிவடைந்துள்ளன. ரயில்வே பாதுகாப்பு ஆணையர் ஒப்புதல் அளித்துள்ளதைத் தொடர்ந்து, புதிய மெட்ரோ வழித்தடம் திறக்கப்படவுள்ளது. அதன் பிறகு, இந்த வழித்தடத்தில் பயணிகள் ரயில் சேவை மே 29-ஆம் தேதி காலை 6 மணி முதல் தொடங்கும்.
மூன்றாவது கட்ட மெட்ரோ ரயில்வே திட்டத்தில் புறவழிச்சாலையை முழுவதையும் சென்றடையும் வகையில் 38.2 கிலோமீட்டர் தூரத்துக்கு ஜனக்புரி மேற்கு - பொட்டானிகல் கார்டன் (மெஜந்தா) வழித்தடம் அமைக்கப்பட்டுள்ளது.
இதில் ஜனக்புரி மேற்கு- கால்காஜி மந்திர் இடையிலான மெட்ரோ வழித்தடத்தில், ஜனக்புரி மேற்கு, டாப்ரி மோர், பாலம், தசரத்புரி, சதர் பஜார், டெர்மினல் 1 - ஐஜிஐ ஏர்போர்ட், சங்கர் விஹார், வசந்த் விஹார், முனிர்கா, ஆர்.கே. புரம், ஹோஸ் காஸ், ஐஐடி, பஞ்ச்சீல் பார்க், சிராக் தில்லி, ஜி.கே. என்கிளேவ், நேரு என்கிளேவ் ஆகிய 16 ரயில் நிலையங்கள் அமைந்துள்ளன.
மொத்தமுள்ள 24.82 கிலோ மீட்டர் வழித்தடத்தில், 21.8 கிலோ மீட்டர் ரயில் பாதை பூமிக்கு அடியில் அமைக்கப்பட்டுள்ளது. எஞ்சிய வழித்தடம் நிலப் பகுதியில் அமைக்கப்பட்டுள்ளது.
சதர் பஜார், சங்கர் விஹார் ரயில் நிலையங்கள் மட்டுமே மேம்பால ரயில் நிலையங்களாகும். இந்த வழித்தடத்தில் ஜனக்புரி மேற்கு மற்றும் ஹோஸ் காஸ் பகுதியில் இடைமாறிச் செல்லும் மெட்ரோ சந்திப்புகள் அமைந்துள்ளன.
மூன்றாம் கட்ட மெட்ரோ ரயில்வே திட்டப் பணியில், சென்ட்ரல் செக்ரட்டேரியட் - கஷ்மீரி கேட் (9.37 கிமீ), பதர்பூர் - எஸ்கார்ட்ஸ் முஜேஸர் (13.98 கிமீ), ஜஹாங்கீர் புரி - சமய்பூர்பதலி (4.49 கிமீ), துர்காபாய் தேஷ்முக் தெற்கு வளாகம் - மஜ்லிஸ் பார்க் (21.56 கிமீ), பொட்டானிக்கல் கார்டன் - கால்காஜி மந்திர் (12.64 கிமீ) ஆகிய வழித்தடங்கள் ஏற்கெனவே மக்கள் பயன்பாட்டுக்கு திறக்கப்பட்டுவிட்டன.
மேலும், துர்காபாய் தேஷ்முக் தெற்கு வளாகம் - ஷிவ் விஹார் ( 37.04 கிமீ), முண்ட்கா - பகர்துர்கர் (11.82கிமீ), நொய்டா சிட்டி சென்டர் - எலக்ட்ரானிக் சிட்டி (6.8 கிமீ), துவாரகா - நஜஃப்கர் (4.30 கிமீ), எஸ்கார்ட்ஸ் முஜேஸர் - பல்லாப்கர் (3.2 கிமீ), தில்ஸாத் கார்டன் - புதிய பேருந்து நிலையம் (9.41 கி.மீ.) ஆகிய வழித்தடங்கள் மட்டும் இனிமேல்தான் திறக்கப்படவுள்ளன.