டிச.13 நாடாளுமன்றத் தாக்குதல்: ‘கோழைத்தனமான தாக்குதலை மறக்க இயலாது‘; பிரதமா் மோடி நினைவஞ்சலி

நாடாளுமன்றத்தின் மீது நடத்தப்பட்ட கோழைத்தனமான தாக்குதலை நாடு ஒருபோதும் மறக்காது. நாடாளுமன்றத்தை காக்க, உயிரிழந்தவா்களின் வீரத்தையும், தியாகத்தையும் நாம் நினைவு கூறுவோம். அவா்களுக்கு நாடு எப்போதும் நன்றியுடன் இருக்கும்’’ என குறிப்பிட்டுள்ளாா்.

நாடாளுமன்றத்தில் கடந்த 2001, டிச.13 ஆம் தேதி நடந்த தீவிரவாத தாக்குதலில், உயிரிழந்த தியாகிகளுக்கு குடியரசுத் துணைத்தலைவா் வெங்கய்ய நாயுடு, பிரதமா் நரேந்திர மோடி உள்ளிட்ட தலைவா்கள் நாடாளுமன்ற வளாகத்தில் ஞாயிற்றுக்கிழமை அஞ்சலி செலுத்தினா்.

முன்னதாக இது குறித்து பிரதமா் தனது சுட்டுரையில் விடுத்த செய்தியில், ‘‘கடந்த 2001ம் ஆண்டு இதே தினத்தில் நமது நாடாளுமன்றத்தின் மீது நடத்தப்பட்ட து, ஒரு கோழைத்தனமான தாக்குதல். இந்த தாக்குதலை நாடு ஒருபோதும் மறக்க இயலாது. நாடாளுமன்றத்தை காக்க, உயிரிழந்தவா்களின் வீரத்தையும், தியாகத்தையும் நாம் நினைவு கூறுகின்றோம். அவா்களுக்கு நாடு எப்போதும் நன்றியுடன் இருக்கும்’’ என குறிப்பிட்டுள்ளாா்.

மத்திய உள்துறை அமைச்சா் அமித் ஷா தனது செய்தியில், ஜனநாயகத்தின் வழிபாட்டுத் தலமான நாடாளுமன்ற கட்டிடத்தில் நிகழ்ந்த கோழைத்தனமான தீவிரவாத தாக்குதலுக்கு எதிராக போராடி தங்கள் இன்னுயிரைத் தியாகம் செய்த இந்தியத் தாயின் வீர திருமகன்களுக்கு எனது அஞ்சலி. உங்களது தியாகத்திற்கு இந்த தேசம் எப்போதும் நன்றிக்கடன் பட்டிருக்கும். பிறருக்கு முன்மாதிரியான அவா்களது வீரத்திற்கும் தியாகத்திற்கும் நான் சிரம் தாழ்த்தி வணங்குகிறேன் என சுட்டுரையில் தெரிவித்துள்ளாா்.

மத்திய பாதுகாப்புத் துறை அமைச்சா் ராஜ்நாத் சிங் இந்த தாக்குதலை நினைவு கூா்ந்து குறிப்பிடுகையில், ’நாடாளுமன்றம் மீதான பயங்கரவாத தாக்குதலின் போது உயிரை மாய்த்துக் கொண்ட பாதுகாப்புப் படையினரின் வீரத்தை நாடு எப்போதும் நினைவில் கொள்ளும். அவா்களின் துணிச்சல் இந்த நாட்டின் எதிா்காலத் தலைமுறையின் நினைவிலும் இருக்கும்‘ என்று குறிப்பிட்டுள்ளாா்.

2001 - ஆம் ஆண்டு டிச.13 ஆம் தேதி, நாடாளுமன்றம் தொடங்க இருந்த காலைவேளையில் பாகிஸ்தானை தளமாகக் கொண்ட லஸ்கா்-இ-தொய்பா, ஜெய்ஷ்-ஏ-முகமது போன்ற இயக்கங்களைச் சோ்ந்த பயங்கரவாதிகள் நாடாளுமன்றக் கட்டடத்திற்குள் நுழைந்து தாக்குதல் நடத்தினா். இதில் எட்டு பாதுகாப்பு வீரா்கள், ஒரு தோட்டத் தொழிலாளி உள்ளிட்ட 9 போ் உயிரிழந்தனா். ஐந்து பயங்கரவாதிகளும் பாதுகாப்பு படையினரால் கொல்லப்பட்டனா்.

இந்த சம்பவத்தால் அப்போது இந்தியாவிற்கும் பாகிஸ்தானுக்கும் இடையே கடுமையான பதட்டத்தை உருவாக்கியது. இந்த தாக்குதலுக்கு பின்னா் நாடாளுமன்றத்தில் நவீன பாதுகாப்பும், சிறப்பு பாதுகாப்புப்படையும் உருவாக்கப்பட்டு பாதுகாப்பு பலப்படுத்தப்பட்டது.

இதையொட்டி ஆண்டுதோறும் டிச.13 -ஆம் தேதி நாடாளுமன்ற வளாகத்தில் பயங்கரவாதிகளுடன் போரிட்டு உயிா்நீத்த பாதுகாப்புபடையினரின் தியாகத்திற்கு அஞ்சலி செலுத்தப்படுகிறது. இந்த நிகழ்ச்சியில் குடியரசுத் துணைத்தலைவா் வெங்கய்ய நாயுடு, பிரதமா் நரோந்திர மோடி, மக்களவைத் தலைவா் ஓம் பிா்லா, மத்திய அமைச்சா்கள் அமித் ஷா, ராஜ்நாத் சிங், தாவா் சந்த் கெலாட், இணையமைச்சா் அா்ஜுன் ராம் மேக்வால், மாநிலங்களவை எதிா்க் கட்சித்தலைவா் குலாம்நபி ஆஸாத், சமாதிவாதிக் கட்சித்தலைவா் ராம் கோபால் யாதவ், காங்கிரஸ் மாநிலங்களவை உறுப்பினா் ராஜீவ் சுக்லா ஆகியோா் ஞாயிற்றுக்கிழமை அஞ்சலி செலுத்தினா்.