எம்சிடி அவைக் கூட்டம் ஒத்திவைப்பு: பாஜக தலைமையகம் அருகே ஆம் ஆத்மி ஆா்ப்பாட்டம்

தில்லி மேயா் தோ்தலில் துணைநிலை ஆளுநரால் நியமிக்கப்பட்ட உறுப்பினா்கள் வாக்குப்பதிவு செய்ய அனுமதிக்கப்படுவாா்கள் என்று தில்லி மாநகராட்சி அவையின் தலைமை அதிகாரி அறிவித்ததற்கு எதிா்ப்புத் தெரிவித்து தில்லியில் பாஜக தலைமையகம் அருகே செவ்வாய்க்கிழமை ஆம் ஆத்மி கட்சியினா் போராட்டம் மேற்கொண்டனா்.

தில்லியில் உள்ள ரெளஸ் அவென்யு சாலையில் கைகளில் பதாகைகளை ஏந்தியவாறு ஆம் ஆத்மி கட்சியின் பல்வேறு தலைவா்களும் தொண்டா்களும் கூடினா். அதன் பிறகு, பாஜகவுக்கு எதிராக அவா்கள் கோஷமிட்டனா். இந்தப் போராட்டத்தை தொடா்ந்து, அந்தப் பகுதியில் ஏராளமான போலீஸாா் பாதுகாப்பில் ஈடுபடுத்தப்பட்டு, பாஜக தலைமையகம் பகுதியில் பாதுகாப்பு பலப்படுத்தப்பட்டிருந்தது. மேலும், ரெளஸ் அவென்யு சாலைப் பகுதியில் ஏராளமான தடுப்புகளும் அமைக்கப்பட்டிருந்தன.

கடந்த திங்கள்கிழமை மேயா் தோ்தல் நடைபெறவிருந்தது. இந்த நிலையில், இத்தோ்தலில் துணைநிலை ஆளுநரால் நியமிக்கப்பட்ட வல்லுநா்கள் வாக்களிப்பாா்கள் என்று தலைமை அதிகாரி சத்யா சா்மா அறிவித்ததை தொடா்ந்து பெரும் அமளி ஏற்பட்டது. இதையடுத்து, தில்லி மாநகராட்சிக்கான மேயா் தோ்தல் நடைபெறாமல் அவை ஒத்திவைக்கப்பட்டது.

செளரவ் பரத்வாஜ்: பரத்இந்த ஆா்ப்பாட்டம் குறித்து ஆம் ஆத்மி கட்சியின் தேசிய செய்தித் தொடா்பாளா் சௌரவ் பரத்வாஜ் கூறுகையில், ‘தோ்தலில் வாக்களிப்பது தொடா்பாக உயா்நீதிமன்ற உத்தரவு இருப்பதாகக் கூறி தலைமை அதிகாரி வேண்டுமென்றே பொய் கூறியுள்ளாா். மேயா் தோ்தலை பாஜக மீண்டும் நடத்த விடாது என்று மனீஷ் சிசோடியா செவ்வாய்க்கிழமை காலை ட்வீட் செய்திருந்தாா். அதே போல்தான் நடந்துள்ளது. ஒவ்வொரு வாக்குக்காகவும் சண்டை நடந்தாலும், பாஜக எம்.பி.க்கள் அவையில் இல்லை என்பதால், அனைத்தும் முன்னரே தீா்மானிக்கப்பட்டிருந்தது. மத்திய அரசு கடந்த ஒரு வருடமாக எம்சிடியை சட்டவிரோதமாக ஆக்கிரமித்துள்ளது. குடிமை அமைப்பை வலுக்கட்டாயமாக நடத்த பாஜக முயற்சித்து வருகிறது. இந்த வழக்கில் உச்சநீதிமன்றமே எங்களின் இறுதி முயற்சியாக இருக்கும். அவா்கள்தான் இப்போது எங்களின் ஒரே நம்பிக்கை. முதலில் மத்திய அரசு குடிமை அமைப்பை ஒரு வருடமாக சட்டவிரோதமாக ஆக்கிரமித்துள்ளது. இப்போது பாஜக எம்சிடியை வலுக்கட்டாயமாக இயக்க முயற்சிக்கிறது என்றாா்.

துா்கேஷ் பதக்: ஆம் ஆத்மி கட்சியின் மூத்த தலைவா் துா்கேஷ் பதக் கூறுகையில், மாநகராட்சி அவையில் ஆம் ஆத்மி கட்சிக்கு அதிக வாக்குப்பதிவு பலம் இருப்பதால், மேயா் தோ்தலை தவிா்க்க பாஜக முயற்சித்து வருகிறது. எம்சிடி பட்ஜெட் ஆண்டுக்கு ரூ. 16,000 கோடி ஆகும். அதை 15 ஆண்டுகளாக பெருக்கி பாஜகவின் ஊழலின் அளவை தீா்மானியுங்கள். தோ்தலில் வாக்களிக்க அனைத்து வல்லுநா்களுக்கும் அழைப்பதன் மூலம் எம்சிடி அவையில் குழப்பத்தை ஏற்படுத்த முதலில் பாஜக காரணமாக இருந்தது. இதற்கு முன்பு அவையில் வல்லுநா்கள் வாக்களித்ததில்லை. தலைமை அதிகாரி அவையில் பொய் கூறியுள்ளாா். இது நீதிமன்ற அவமதிப்பு தவிர வேறில்லை. ஆம் ஆத்மி தடியடி, மற்றும் தண்ணீா் பீரங்கிகளை எதிா்கொள்ள ஏற்கெனவே தயாராக உள்ளது. ஆனால், பாஜவுக்கு எதிரான எங்களின் ‘போராட்டம்’ தொடரும்’ என்றாா்.

கடந்த ஜனவரி 6 மற்றும் ஜனவரி 24 ஆகிய தேதிகளில் நடத்தப்பட்ட முதல் 2 மாநகராட்சி அவை கூட்டங்கள் ஆம் ஆத்மி மற்றும் பாஜக உறுப்பினா்களிடையே ஏற்பட்ட கடுமையான வாக்குவாதங்கள் மற்றும் அமளியைத் தொடா்ந்து தலைமை அதிகாரியால் ஒத்திவைக்கப்பட்டது. தில்லி மாநகராட்சி சட்டம் 1957-இன் படி மாநகராட்சி தோ்தலுக்குப் பிறகு அவையின் முதல் அமா்வில் மேயரும் துணைமேரும் தோ்ந்தெடுக்கப்பட வேண்டும். எனினும், தில்லி மாநகராட்சிக்கான தோ்தல் டிசம்பா் 4-ஆம் தேதி நடத்தப்பட்டதிலிருந்து இரண்டு மாதங்களாகியும் இன்னும் மேயா் தோ்ந்தெடுக்கப்படாமல் இருந்து வருகிறது.