தில்லியில் இறுதியாக 238 வேட்புமனுக்கள் ஏற்பு: இன்று வாபஸ் பெற கடைசி நாள்

தில்லி தேசியத் தலைநகா் பிரதேசத்தில் நடைபெறவுள்ள மக்களவைத் தோ்தலுக்கு இறுதியாக 238 வேட்புமனுக்கள் ஏற்கப்பட்டுள்ளது என்று தில்லி தலைமைத் தோ்தல் அதிகாரி அலுவலகம் புதன்கிழமை தகவல் தெரிவித்துள்ளது.

இது தொடா்பாக வெளியிடப்பட்டுள்ள அறிக்கையில் கூறியிருப்பதாவது: வரும் மே 25-ஆம் தேதி தில்லி தேசியத் தலைநா் பிரதேசத்தில் மக்களவைத் தோ்தல் வாக்குப்பதிவு நடைபெறவுள்ளது. இதனையொட்டி, தோ்தலில் போட்டியிட விரும்பும் வேட்பாளா்களிடம் இருந்து கடந்த ஏப்ரல் 29-ஆம் தேதி முதல் மே 6-ஆம் வரை வேட்புமனுக்கள் பெறப்பட்டது. தில்லியில் உள்ள 7 மக்களவைத் தொகுதிகளில் மொத்தமாக 265 வேட்பாளா்களிடமிருந்து 367 வேட்புமனுக்கள் பெறப்பட்டன. கடந்த மே 7- ஆம் தேதி அனைத்து வேட்புமனுக்களும் மறுபரிசீலனை செய்யப்பட்டு இறுதியாக 238 வேட்புமனுக்கள்

ஏற்கப்பட்டுள்ளது. அதன்படி, சாந்தினி செளக்கில்-39, வடகிழக்கு தில்லி-45, கிழக்கு தில்லி-31, புது தில்லி-29, வடமேற்கு தில்லி (எஸ்சி) -35, மேற்கு தில்லி-30, தெற்கு தில்லி -29 என்ற எண்ணிக்கையில் மக்களவைத் தொகுதி வாரியாக வேட்புமனுக்கள் இறுதியாக ஏற்கப்பட்டுள்ளது.

மேலும், மே 9-ஆம் தேதி வேட்புமனுக்களை திரும்பப் பெறுவதற்கான கடைசி நாளாகும். வேட்புமனு தாக்கல் செயல்முறை மற்றும் தோ்தல் வழிகாட்டுதல் தொடா்பான கூடுதல் தகவல் மற்றும் புதுப்பிப்புகளுக்கு, ஆா்வமுள்ளவா்கள் தில்லி தலைமைத் தோ்தல் அலுவலரின் அதிகாரப்பூா்வ இணையதளத்தை அணுகலாம் என்று தெரிவிக்கப்பட்டுள்ளது.