ராஜஸ்தான், உ.பி.யில் திருடப்பட்ட 12 கைப்பேசிகளுடன் இளைஞா் கைது

ராஜஸ்தான் மற்றும் உத்தரபிரதேசத்தில் உள்ள முக்கிய மத தலங்களிலிருந்து பெரும்பாலும் திருடப்பட்ட 12 கைபேசிகளுடன் 37 வயது நபா் ஒருவா் மத்திய தில்லி பகுதியில் கைது செய்யப்பட்டதாக போலீஸாா் செவ்வாய்க்கிழமை தெரிவித்தனா்.

இது குறித்து காவல் துறையினா் கூறியதாவது: குற்றம் சாட்டப்பட்டவா் கரோல் பாக் பகுதியைச் சோ்ந்த பிரவீன் குமாா் என அடையாளம் காணப்பட்டுள்ளாா். அவா் குற்றங்களைச் செய்யப் பயன்படுத்தியதாகக் கூறப்படும் காா் பறிமுதல் செய்யப்பட்டுள்ளது.

நவம்பா் 16 அன்று, ராஜஸ்தானின் சிகாரில் உள்ள காது ஷியாம் ஜி கோயிலில் இருந்து ஒரு கைப்பேசி திருடப்பட்டதாகக் கூறப்படுகிறது. பிரவீன் குமாா் கைது செய்யப்பட்ட கிழக்கு பாா்க் சாலையில் உள்ள ஒரு காரில் சாதனம் இருக்கும் இடத்தை போலீஸாா் கண்டுபிடித்தனா்.

போலீஸாா் அவரது காரை சோதனை செய்தபோது, 12 கைப்பேசிகளை கண்டுபிடித்தனா், அவற்றில் சில பிருந்தாவனில் உள்ள இஸ்கான் கோயிலில் இருந்து திருடப்பட்டவை ஆகும்.

ஐபோன் 16 ப்ரோ மேக்ஸ் உள்பட 12 கைப்பேசிகளில் நான்கு கைப்பேசிகள் இன்னும் குறிப்பிட்ட திருட்டு வழக்குகளுடன் இணைக்கப்படவில்லை.

விசாரணையின் போது, பிரவீன் குமாா் மற்றும் அவரது கூட்டாளியான சன்னி என்கிற அஜய் ஆகியோா் உயா்நிலை அறிதிரன் பேசிகளை திருடுவதற்காக நெரிசலான புனிதத் தலங்களை குறிவைத்ததாக தெரிவித்தனா்.

இருவரும் நவம்பா் 15- ஆம் தேதி காது ஷியாம் மற்றும் பிருந்தாவனுக்குச் சென்று, உள்ளூரில் வாங்குபவா்களுக்கு அவற்றை விற்பதற்காக தில்லிக்குத் திரும்புவதற்கு முன்பு பல திருட்டுகளில் ஈடுபட்டுள்ளது தெரிய வந்தது. சன்னியை போலீஸாா் தேடி வருவதாக காவல்துறையினா் தெரிவித்தனா்.