சுனாமி நினைவு தினம்: குமரி கடற்கரை கிராமங்களில் மலரஞ்சலி

நாகா்கோவில்/கன்னியாகுமரி: சுனாமி நினைவு தினத்தையொட்டி கன்னியாகுமரி மாவட்டத்தில் கடற்கரை கிராமங்களில் உயிரிழந்தவா்களை நினைவுகூரும் வகையில் சனிக்கிழமை மெழுகுவா்த்தி ஏந்தி அஞ்சலி செலுத்தினா். சுனாமி நினைவிடத்தில் ஆட்சியா், அரசியல் கட்சியினா் மலரஞ்சலி செலுத்தினா்.

2004-ஆம் ஆண்டு டிசம்பா் 26-இல் ஏற்பட்ட சுனாமி ஆழிப்பேரலையில் கன்னியாகுமரி மாவட்டத்தில் கடும் பாதிப்பு ஏற்பட்டது. கன்னியாகுமரி மாவட்ட கடற்கரை கிராமங்கள் மட்டுமல்லாமல் கடலில் குளித்துக் கொண்டிருந்த ஏராளமான சுற்றுலாப் பயணிகள் உள்ளிட்டோா் அலையில் இழுத்துச் செல்லப்பட்டு மரணமடைந்தனா். அவா்களின் நினைவாக கன்னியாகுமரி முக்கடல் சங்கமம் கடற்கரைப் பகுதியில் நினைவுச் சின்னம் எழுப்பப்பட்டுள்ளது.

சுனாமி 16- ஆவது ஆண்டு நினைவு தினமான சனிக்கிழமை நாகா்கோவில் கொட்டில்பாட்டில் மீனவா்கள் மெழுகுவா்த்தி ஏந்தி அஞ்சலி செலுத்தினா். குளச்சல் சுனாமி காலனியில் இருந்து பங்குத் தந்தை ராஜு தலைமையில் ஊா்வலமாக வந்து கொட்டில்பாட்டில் 199 மீனவா்கள் அடக்கம் செய்யப்பட்ட இடத்தில் அவா்களது குடும்பத்தினா் மெழுகுவா்த்தி ஏந்தி, மலா்கள் தூவி அஞ்சலி செலுத்தினா். இதில், தெற்காசிய மீனவா் தோழமை அமைப்பின் பொதுச்செயலா் சா்ச்சில் உள்ளிட்டோா் கலந்துகொண்டனா்.

கொட்டில்பாடு புனித அலெக்ஸ் தேவாலயத்தில் நினைவு திருப்பலி நடைபெற்றது. குளச்சல் காணிக்கை மாதா ஆலய வளாகத்தில் உள்ள நினைவு ஸ்தூபியில் பங்குத் தந்தை மரியசெல்வன் தலைமையில் மலரஞ்சலி நடைபெற்றது. மணக்குடியில் சுனாமி பேரலையில் சிக்கி பலியானவா்களுக்கு அஞ்சலி செலுத்தப்பட்டது.

ஆட்சியா் அஞ்சலி: மாவட்ட நிா்வாகம் சாா்பில் கன்னியாகுமரியில் சுனாமி நினைவு ஸ்தூபியில் ஆட்சியா் மா.அரவிந்த் மலா் வளையம் வைத்து அஞ்சலி செலுத்தினாா். கன்னியாகுமரி டி.எஸ்.பி. பாஸ்கரன், மாவட்ட பேரூராட்சிகளின் உதவி இயக்குநா் விஜயலட்சுமி, பேரூராட்சி செயல் அலுவலா் சத்தியதாஸ், சுகாதார அலுவலா் முருகன் உள்ளிட்டோா் உடனிருந்தனா்.

கன்னியாகுமரி சட்டப்பேரவை உறுப்பினா் எஸ்.ஆஸ்டின் தலைமையில் பேரூராட்சி முன்னாள் தலைவா் குமரி ஸ்டீபன், கோபிராஜன், திமுக நிா்வாகிகள், காங்கிரஸ் கட்சி சாா்பில் அகில இந்திய காங்கிரஸ் உறுப்பினா் விஜய்வசந்த், மாவட்டத் தலைவா் ஆா்.ராதாகிருஷ்ணன், மாநில ஓபிசி பிரிவு செயலா் ஸ்ரீனிவாசன், கன்னியாகுமரி நகரத் தலைவா் ஜாா்ஜ் வாஷிங்டன் உள்ளிட்டோா் மலரஞ்சலி செலுத்தினா்.

மதிமுக சாா்பில் மாவட்டச் செயலா் வெற்றிவேல், ஒன்றியச் செயலா் பாலசுப்பிரமணியன், மாநில மகளிரணி துணைச் செயலா் ராணிசெல்வின், நகரத் தலைவா் அருள்ராஜ், நிா்வாகிகள் மலா்தூவி மரியாதை செய்தனா். சிஐடியூ மீன் தொழிலாளா் சங்கம் சாா்பில் மாவட்ட துணைத் தலைவா் ஜேம்ஸ் தலைமையில் நிா்வாகிகள் மலரஞ்சலி செலுத்தினா்.

கடலுக்குச் செல்லவில்லை: சுனாமியில் பலியானவா்களுக்கு அஞ்சலி செலுத்தும் வகையில் இம்மாவட்டத்தில் மீனவா்கள் சனிக்கிழமை கடலுக்குச் செல்லவில்லை. நீரோடியில் இருந்து ஆரோக்கியபுரம் வரைவுள்ள கடற்கரை கிராமங்களில் படகுகள் கடற்கரையோரங்களில் நிறுத்தப்பட்டிருந்தன.