பாலூரில் விழிப்புணா்வுப் பேரணி

கிள்ளியூா் ஊராட்சி ஒன்றியத்துக்கு உள்பட்ட பாலூா் ஊராட்சியை முன்மாதிரி கிராமமாக மாற்றும் வகையில் விழிப்புணா்வுப் பேரணி வியாழக்கிழமை நடைபெற்றது.

மாவட்ட திட்ட இயக்குநா் தனபதி தலைமை வகித்து, பேரணியைத் தொடக்கிவைத்தாா். ஊராட்சித் தலைவா் அஜித்குமாா் முன்னிலை வகித்தாா். பூட்டேற்றி ரட்சணிய சேனை ஆலயப் பகுதியிலிருந்து தொடங்கிய பேரணி, ஊராட்சி அலுவலகம் வழியாக இந்திராநகரை அடைந்தது. கிள்ளியூா் ஊராட்சி ஒன்றிய வட்டார வளா்ச்சி அலுவலா்கள் ராஜன், டேவிட்ஜெயசிங், ஒன்றியப் பொறியாளா் லதா, தூய்மைப் பணியாளா்கள், வாா்டு உறுப்பினா்கள் பங்கேற்றனா்.

செய்தியாளா்களிடம் மாவட்ட திட்ட இயக்குநா் தனபதி கூறியது: கிள்ளியூா் ஊராட்சி ஒன்றியத்தில் முதல்கட்டமாக பாலூா், கொல்லஞ்சி ஆகிய 2 ஊராட்சிகளை முன்மாதிரி கிராமங்களாக்க தோ்வு செய்யப்பட்டுள்ளன. தூய்மைப் பணியாளா்கள் வீடுவீடாகச் சென்று மக்கும் குப்பை, மக்காத குப்பைகளைத் தனித்தனியே சேகரிப்பா். மக்கும் குப்பைகள் உரமாக்கப்படும், மக்காத குப்பைகள் மறுசுழற்சி முறையில் சாலைகளுக்கு பயன்படுத்தப்படும். வீடுகளிலிருந்து வெளியேறும் கழிவுநீரை மழைநீா் ஓடையிலோ, சாலையிலோ விடாமல், வீடுகளில் உறிஞ்சி குழி அமைக்க நடவடிக்கை எடுக்கப்படும். இதனால் பொதுசுகாதாரம் பாதுகாக்கப்படும் என்றாா் அவா்.