ஓமன் நாட்டில் உணவின்றி தவிக்கும் கன்னியாகுமரி மீனவா்களை மீட்க வேண்டும்: எம்எல்ஏ எஸ். ராஜேஷ்குமாா்

ஓமன் நாட்டிலுள்ள துறைமுகத்தில் விசைப்படகில் உணவின்றி தவித்துவரும் 5 மீனவா்களை மீட்க தமிழக அரசு நடவடிக்கை எடுக்க வேண்டும் என, கிள்ளியூா் எம்எல்ஏ எஸ். ராஜேஷ்குமாா் வலியுறுத்தியுள்ளாா்.

இதுகுறித்து தமிழக முதல்வா் மு.க.ஸ்டாலினுக்கு அவா் புதன்கிழமை அனுப்பிய மனு: கன்னியாகுமரி மாவட்டம் கிள்ளியூா் பேரவைத் தொகுதிக்குள்பட்ட மிடாலம் மீனவக் கிராமத்தைச் சோ்ந்த ஆன்றோ, வாணியக்குடி உள்ளிட்ட பகுதிகளைச் சோ்ந்த சகாய விஜயகுமாா், மரியநாயகம், டாா்வின், ஜெபின் ஆகிய 5 மீனவா்களை மிடாலம் பகுதியைச் சோ்ந்த கேப்டன் சந்திரன் என்பவா் ஓமன் நாட்டில் மீன்பிடித் தொழில் செய்வதற்காக நுழைவுஇசைவு (விசா) வழங்கி அழைத்துச் சென்றுள்ளாா்.

தற்போது அந்த 5 பேருக்கும் உணவுப் பொருள்கள், ஊதியம் வழங்காமல் சந்திரன் ஊருக்கு வந்துள்ளாா். இதனால், 5 மீனவா்களும் ஓமன் நாட்டிலுள்ள துறைமுகத்தில் உணவின்றி விசைப்படகிலேயே தங்கி தவித்துவருகின்றனா்.

எனவே, மீனவா்களுக்கு உணவுப்பொருள்கள், மருத்துவ உதவிகள் அளிப்பதுடன், அவா்களை உடனடியாக மீட்கவும் அரசு நடவடிக்கை எடுக்க வேண்டும் என்றாா் அவா்.