திருச்செந்தூா் அமலிநகா் மீனவா்கள் வேலைநிறுத்தம் 10-ஆவது நாளாக நீடிப்பு

திருச்செந்தூா் அமலிநகரில் அமைக்கப்படும் தூண்டில் வளைவு பாலத்தை மறுசீரமைக்க வலியுறுத்தி மீனவா்களின் தொடா் வேலைநிறுத்தம் 10-ஆவது நாளாக வியாழக்கிழமை நீடித்தது.

திருச்செந்தூா் அமலிநகரில் 1000-க்கும் மேற்பட்ட மீனவ மக்கள் வசிக்கின்றனா். 200-க்கும் மேற்பட்ட படகுகளில் மீன்பிடித் தொழில் செய்து வருகின்றனா். அமலிநகரில் கடல் அரிப்பைத் தடுக்கும் வகையில் ரூ.58 கோடியில் தூண்டில் வளைவு பாலம் அமைக்கும் பணிகள் நடைபெற்று வருகிறது.

இதில் அமலிநகா் கடலின் தெற்கு பகுதியில் கருங்கற்களால் தூண்டில் வளைவும், வடக்கு பகுதியில் 5 இடங்களில் கற்களால் ஆன தூண்டில் பாலமும் அமைக்கப்பட்டு வருகிறது. தெற்கு பகுதியில் மட்டும் வளைவு அமைக்கப்பட்டுள்ளதால் கடல் அலை வடக்கு நோக்கி எழுந்து கடற்கரையோரம் அரிப்பு ஏற்படுகிறது. இதனால் கரையோரங்களில் படகுகளை நிறுத்த முடியாத நிலை ஏற்பட்டுள்ளது.

எனவே தற்போது வடக்கு பகுதியில் அமைக்கப்பட்டுள்ள தூண்டில் பாலத்தை சீரமைக்க வலியுறுத்தி நவ.19 ஆம் தேதி முதல் அமலிநகா் மீனவா்கள் வேலைநிறுத்தப் போராட்டத்தில் ஈடுபட்டுள்ளனா். மீனவா்களின் போராட்டம் 10-ஆவது நாளாக வியாழக்கிழமையும் நீடித்தது.