தூத்துக்குடியில் டிச.3இல் மாற்றுத் திறனாளிகள் குறைதீா் கூட்டம்

தூத்துக்குடியில் டிச. 3இல் மாற்றுத் திறனாளிகளுக்கான சிறப்பு குறைதீா் கூட்டம் நடைபெறவுள்ளதாக, ஆட்சியா் க. இளம்பகவத் தெரிவித்துள்ளாா்.

இதுகுறித்து அவா் வெளியிட்ட செய்திக்குறிப்பு: தூத்துக்குடி மாவட்டத்தைச் சோ்ந்த மாற்றுத் திறனாளிகளுக்கு ஆட்சியா் அலுவலக வளாகத்தில் சிறப்பு குறைதீா் கூட்டம் டிச. 3ஆம் தேதி காலை 10 மணிக்கு நடைபெறவுள்ளது.

இதில், உதவி உபகரணங்கள்- மாதாந்திர பராமரிப்பு உதவித்தொகை வழங்கும் திட்டம், வேலையில்லா படித்த இளைஞா்களுக்கு வேலைவாய்ப்பு உருவாக்கும் திட்டம், பிரதமரின் சுயவேலைவாய்ப்பு உருவாக்கும் திட்டம், தேசியமயமாக்கப்பட்ட வங்கிகளில் சிறு குறுந்தொழில் சுயவேலைவாய்ப்பு வங்கிக் கடன் மானியம் வழங்கும் திட்டம், மத்திய கூட்டுறவு வங்கி மூலம் வீடு கட்ட வட்டியில்லா கடன், ஆவின் பாலகம் வழங்கும் திட்டம், கல்வி - திருமண உதவித் தொகைகள் வழங்கும் திட்டம் உள்பட பல்வேறு திட்டங்களுக்கு விண்ணப்பிக்கலாம். விருப்பமுள்ளோா் தங்களது தேசிய அடையாள அட்டை, குடும்ப அட்டை, ஆதாா் அட்டை, வங்கிக் கணக்குப் புத்தகம் ஆகியவற்றின் நகல்களுடன் பங்கேற்கலாம் என்றாா் அவா்.