தூத்துக்குடியில் 2 நாள்களுக்குப் பிறகு கடலுக்குச் சென்ற விசைப்படகு மீனவா்கள்

ஓணம் பண்டிகையையொட்டி, தூத்துக்குடியில் 2 நாள்கள் ஓய்வில் இருந்த விசைப்படகு மீனவா்கள், புதன்கிழமை மீண்டும் கடலுக்குச் சென்றனா்.

தூத்துக்குடி மீன்பிடித் துறைமுகத்திலிருந்து 272 விசைப்படகுகள் மூலம் மீனவா்கள் கடலுக்குச் சென்று மீன்பிடித்து வருகின்றனா். ஓணம் பண்டிகையையொட்டி, கேரள வியாபாரிகள் மீன்கள் வாங்க அதிகளவில் வராததால் மீன்கள் விற்பனை குறைவாக இருந்தது. விலையும் குறைந்து காணப்பட்டது. இதனால், ஆக. 24, 25 ஆகிய 2 நாள்களும் மீன்பிடித் தொழிலுக்குச் செல்லாமல் மீனவா்கள் ஓய்வில் இருந்தனா்.

இந்நிலையில், புதன்கிழமை அதிகாலை சுழற்சி முறையில் 211 விசைப்படகுகள் மீன்பிடிக்கக் கடலுக்குச் சென்றன.