மாலத்தீவுக்கு கடத்த முயன்ற ரூ.17 கோடி கஞ்சா ஆயில் பறிமுதல்: 4 போ் கைது

தூத்துக்குடியிலிருந்து கடல் வழியாக மாலத்தீவுக்கு கடத்தமுயன்ற ரூ.17 கோடி மதிப்பிலான கஞ்சா ஆயிலை க்யூ பிரிவு போலீஸாா் பறிமுதல் செய்து, 4 பேரை கைது செய்தனா்.

கேரளத்திலிருந்து காரில், கஞ்சா ஆயில் தூத்துக்குடிக்கு கடத்திவரப்படுவதாக க்யூ பிரிவு காவல்துறை துணைத் தலைவா் கல்யாண், காவல் கண்காணிப்பாளா் ராமமூா்த்திக்கு தகவல் கிடைத்தது.

இதையடுத்து, தூத்துக்குடி பூபாலராயா்புரம் பகுதியில் போலீஸாா் ஞாயிற்றுக்கிழமை நள்ளிரவில் வாகனத் தணிக்கையில் ஈடுபட்டனா். அப்போது வந்த காரை மடக்கி சோதனையிட்டதில், ‘ஹஷிஸ்’ எனப்படும் கஞ்சா ஆயில் 17 கிலோ இருந்தது கண்டறியப்பட்டது. இதன் சா்வதேச சந்தை மதிப்பு ரூ.17 கோடி எனக் கூறப்படுகிறது.

காருடன், கஞ்சா ஆயிலை பறிமுதல் செய்த போலீஸாா், இதுதொடா்பாக, தூத்துக்குடி மத்திய அரசு ஊழியா் காலனியைச் சோ்ந்த ரெனிஸ்டன் (53), மறக்குடி தெருவைச் சோ்ந்த அந்தோணி லிவிட்டன் (36), தெப்பக்குளம் தெருவைச் சோ்ந்த ரொசாரியோ (40), சுனாமி காலனியைச் சோ்ந்த சோ்மதுரை (46) ஆகிய 4 பேரை கைது செய்தனா்.

விசாரணையில், கேரளத்திலிருந்து காரில் கஞ்சா ஆயிலை தூத்துக்குடிக்கு கொண்டு வந்து, அங்கிருந்து கடல் வழியாக மாலத்தீவுக்கு கடத்த திட்டமிட்டிருந்தது தெரியவந்துள்ளது.