அரசுப் பேருந்து மோதி பெட்ரோல் பங்க் ஊழியா் பலி

அரியலூரை அடுத்த அஸ்தினாபுரம் அருகே அரசுப் பேருந்து மோதியதில் சைக்கிளில் சென்ற பெட்ரோல் பங்க் ஊழியா் உயிரிழந்தாா்.

அஸ்தினாபுரம் பிரதானச் சாலை பகுதியில் வசிப்பவா் மாணிக்கம் மகன் தங்கராசு(60). மண்டையன்குறிச்சி சாலையில் உள்ள ஒரு பெட்ரோல் பங்கில் பணியாற்றி வந்தாா். இந்நிலையில், ஞாயிற்றுக்கிழமை மதியம் இவா், பெட்ரோல் பங்குக்கு சைக்கிளில் சென்று கொண்டிருந்தாா். அப்போது ஜயங்கொண்டத்தில் இருந்து அரியலூா் நோக்கிச் சென்ற அரசுப் பேருந்து மோதியதில் தங்கராசு பலத்த காயமடைந்தாா். அக்கம்பக்கத்தினா் அவரை மீட்டு அரியலூா் அரசு மருத்துவமனைக்கு கொண்டு சென்றனா். அங்கு பரிசோதித்த மருத்துவா்கள் தங்கராசு ஏற்கெனவே உயிரிழந்துவிட்டதாக தெரிவித்தனா். இதுகுறித்து கயா்லாபாத் போலீஸாா் வழக்குப் பதிந்து விசாரிக்கின்றனா்.