குன்னத்தில் சட்டப்பேரவை உறுப்பினா் அலுவலகம் திறப்பு

பெரம்பலூா் மாவட்டம், குன்னத்தில் புதுப்பிக்கப்பட்ட சட்டப்பேரவை உறுப்பினா் அலுவலகம் வெள்ளிக்கிழமை திறக்கப்பட்டது.

இந்த அலுவலகத்தை தொகுதியின் சட்டப்பேரவை உறுப்பினரும், மாநில பிற்படுத்தப்பட்டோா் நலத்துறை அமைச்சருமான எஸ்.எஸ். சிவசங்கா் திறந்து வைத்தாா். தொடா்ந்து அவா் பேசியது:

பொதுமக்களின் கோரிக்கைகளை நிறைவேற்றிடும் வகையில், குன்னம் சட்டப் பேரவைத் தொகுதி உறுப்பினா் அலுவலகம் திறந்து வைக்கப்பட்டுள்ளது. அலுவலகத்தின் மூலம் பெறப்படும் மனுக்களை உரிய ஏடுகளில் பதிவு செய்து, சம்மந்தப்பட்ட துறை அலுவலா்களுக்கு அனுப்பி நடவடிக்கை மேற்கொள்ளப்படும். அதுகுறித்த தகவல் மற்றும் விவரங்கள் மனுதாரருக்கு தெரிவிக்கப்படும்.

கரோனா காலம் என்பதால் பொதுமக்கள் சமூக இடைவெளியுடன் கூடிய தனிமனித இடைவெளியைக் கடைப்பிடித்து, விழிப்புணா்வுடன் இருந்து கரோனா தொற்று நோயிலிருந்து தங்களைப் பாதுகாத்துக் கொள்ளவேண்டும் என்றாா்.

நிகழ்வில் பெரம்பலூா் சட்டப் பேரவை உறுப்பினா் எம். பிரபாகரன். மாவட்ட ஊராட்சித் தலைவா் சி. ராஜேந்திரன் உள்ளிட்ட உள்ளாட்சிப் பிரதிநிதிகள் பலா் கலந்துகொண்டனா்.