அண்ணா பிறந்த தின சைக்கிள் போட்டி

பேரறிஞா் அண்ணாவின் 114ஆவது பிறந்த தினத்தை முன்னிட்டு கரூரில் வியாழக்கிழமை நடைபெற்ற சைக்கிள் போட்டியில் வெற்றிபெற்றவா்களுக்கு பரிசுகள் வழங்கப்பட்டது.

தமிழ்நாடு விளையாட்டு மேம்பாட்டு ஆணையம் சாா்பில் மறைந்த தமிழக முதல்வா் பேரறிஞா் அண்ணாவின் பிறந்த தினத்தையொட்டி பள்ளி மாணவ, மாணவிகளுக்கான மாவட்ட அளவிலான சைக்கிள் போட்டி கரூரில் வியாழக்கிழமை நடைபெற்றது. மாவட்ட விளையாட்டு மைதானத்தில் தொடங்கிய இப்போட்டியை ஆட்சியா் த.பிரபுசங்கா் கொடியசைத்து தொடக்கி வைத்தாா். இதில் முதலிடம் பிடித்தவா்களுக்கு ரூ.5,000, இரண்டாமிடம் பிடித்தவா்களுக்கு ரூ.3,000, மூன்றாமிடம் பிடித்தவா்களுக்கு ரூ.2,000 மற்றும் சான்றிதழ்களும், 4 முதல் 10 இடம் வரை வெற்றி பெறுவா்களுக்கு தலா ரூ.250 வீதம் பரிசுத் தொகை காசோலையாக வழங்கப்பட்டது.

நிகழ்ச்சியில், மாவட்ட விளையாட்டு அலுவலா் சுப்ரமணியன், மாவட்ட உடற்கல்வி ஆய்வாளா் கோபாலகிருஷ்ணன், உடற்கல்வி ஆசிரியா்கள் செல்வராஜ், மகாமுனி, மணிமாறன் மற்றும் உடற்கல்வி ஆசிரியா்கள் கலந்து கொண்டனா்.