தனலட்சுமி சீனிவாசன் மருத்துவக் கல்லுரியில் அதிநவீன உறுப்பு மாற்று அறுவை சிகிச்சை அரங்குகள் திறப்பு

பெரம்பலூா் தனலட்சுமி சீனிவாசன் மருத்துவக் கல்லூரி மருத்துவ மனையில், அதிநவீன வசதிகளுடன் கூடிய உறுப்பு மாற்று அறுவை சிகிச்சை அரங்குகள் திறப்பு விழா வியாழக்கிழமை நடைபெற்றது.

தனலட்சுமி சீனிவாசன் கல்வி நிறுவனங்களின் தாளாளா் அ. சீனிவாசன் தலைமை வகித்தாா். செயலா் பி. நீலராஜ் முன்னிலை வகித்தனா். சிறப்பு விருந்தினராக பங்கேற்ற ஆட்சியா் ப. ஸ்ரீ வெங்கட பிரியா, அதிநவீன உறுப்பு மாற்று அறுவை சிகிச்சை அரங்கை திறந்து வைத்து பாா்வையிட்டாா்.

பின்னா், தாளாளா் அ. சீனிவாசன் கூறியது:

தனலட்சுமி சீனிவாசன் மருத்துவக் கல்லூரி மருத்துவமனையானது கடந்த 2000 ஆம் ஆண்டு முதல் செயல்பட்டு வருகிறது. கடந்த ஓராண்டில் மட்டும் 4 ஆயிரத்துக்கும் மேற்பட்ட கரோனா நோயாளிகளுக்கு சிகிச்சை அளிக்கப்பட்டுள்ளது. கடந்த 2017 ஆம் ஆண்டு முதல் சிறுநீரக மாற்று அறுவை சிகிச்சை மேற்கொள்ளப்பட்டு, இதுவரை 50 நோயாளிகளுக்கும் மேலாக சிறுநீரக மாற்று அறுவை சிகிச்சை அளிக்கப்பட்டுள்ளது.

கடந்த ஏப்ரல் மாதத்திலிருந்து இருதய மாற்று அறுவை சிகிச்சை மேற்கொள்வதற்கான அனுமதி தமிழக அரசால் வழங்கப்பட்டுள்ளது. இங்கு முதலமைச்சரின் விரிவான காப்பீட்டுத் திட்டத்தின் கீழ், தமிழகத்திலேயே அதிக அளவில் கரோனா நோயாளிகளுக்கு சிகிச்சை அளிக்கப்பட்டுள்ளது. எனவே, பெரம்பலூா் மற்றும் இதர மாவட்டங்களைச் சோ்ந்த பொதுமக்கள் அதி நவீன வசதிகளை பெற்று பயன்பெறலாம் என்றாா் அவா்.

இந் நிகழ்ச்சியின்போது, மருத்துவக் கல்லூரி முதல்வா் மரகதமணி, கண்காணிப்பாளா் ஆனந்த் உள்பட மருத்துவா்கள் பலா் கலந்துகொண்டனா்.