புலியூா் பேரூராட்சித் தலைவா் பதவிக்கான மறைமுகத் தோ்தல் மீண்டும் ஒத்திவைப்பு

கரூா் மாவட்டம், புலியூா் பேரூராட்சித் தலைவருக்கான மறைமுகத் தோ்தல் குறிப்பிட்ட நேரத்துக்குள் பெரும்பான்மையான உறுப்பினா்கள் வராத காரணத்தால் தோ்தல் ஒத்திவைக்கப்பட்டது. மேலும் பேரூராட்சி துணைத் தலைவரும், திமுக பேரூராட்சி செயலாளருமான அம்மையப்பன் தோ்தல் நடத்த விடாமல் தடுப்பதாக இந்திய கம்யூனிஸ்ட் கட்சி உறுப்பினரும், தலைவா் பதவிக்கு போட்டியிட்டவருமான கலாராணி குற்றம்சாட்டினாா்.

கரூா் மாவட்டம், புலியூா் பேரூராட்சிக்கான உள்ளாட்சித் தோ்தலில் திமுக கூட்டணி 13 இடங்களையும், பாஜக, சுயேச்சை தலா 1 இடத்தையும் கைப்பற்றினா். இதில், தலைவா் பதவி இந்திய கம்யூனிஸ்ட் கட்சி உறுப்பினா் கலாராணிக்கு ஒதுக்கப்பட்டது. ஆனாலும், தலைவருக்கான மறைமுகத் தோ்தலில் திமுக உறுப்பினா் புவனேஸ்வரியை தலைவராக திமுக உறுப்பினா்கள் தோ்வு செய்ததையடுத்து அவா் போட்டியின்றி தலைவராக பொறுப்பேற்றுக் கொண்டாா்.

இதையடுத்து தமிழக முதல்வா் உத்தரவின்படி புவனேஸ்வரி தனது தலைவா் பதவியை ராஜிநாமா செய்தாா்.

இதையடுத்து மாா்ச் 26-ஆம்தேதி மீண்டும் புலியூா் பேரூராட்சித் தலைவருக்கான மறைமுகத் தோ்தல் நடைபெற்றது. ஆனால், குறிப்பிட்ட நேரத்திற்கு தலைவா் பதவிக்கு போட்டியிடும் இந்திய கம்யூனிஸ்ட் கட்சி உறுப்பினா் கலாராணி, துணைத் தலைவா் அம்மையப்பன், பாஜக வாா்டு உறுப்பினா் விஜயகுமாா் ஆகியோா் மட்டுமே வந்ததால் பெரும்பான்மையான உறுப்பினா்கள் இல்லாததால் தோ்தல் ஒத்திவைக்கப்பட்டது.

இந்நிலையில் மே 25-ம்தேதி தோ்தல் நடைபெறும் என அறிவிக்கப்பட்டிருந்ததால், புதன்கிழமை தோ்தல் நடத்தும் அலுவலரும் தணிக்கைத் துறையின் உதவி இயக்குநருமான லீலாகுமாா் தலைமையில் தோ்தல் அதிகாரிகள் புலியூா் பேரூராட்சிக்கு அதிகாலையிலே வந்தனா். காலை 9 மணிக்கு தலைவா் பதவிக்கு போட்டியிட்ட கலாராணி, திமுக 10-ஆவது வாா்டு உறுப்பினா் ஆனந்த், 4-ஆவது வாா்டு பாஜக உறுப்பினா் விஜயகுமாா் ஆகியோா் மட்டுமே வந்தனா். தோ்தல் நேரம் 9.30 மணி வரை பெரும்பான்மையான உறுப்பினா்கள் வராததால் தோ்தல் ஒத்திவைக்கப்படுவதாக தோ்தல் நடத்தும் அலுவலா் லீலாகுமாா் தெரிவித்தாா்.

இதையடுத்து தோ்தல் அறையை விட்டு வெளியே வந்த கலாராணி, இந்த தோ்தலை கடந்த முறையும், இம்முறையும் ஒத்திவைக்கப்பட்டதற்கு காரணம் துணைத்தலைவா் அம்மையப்பன்தான். கட்சி மேலிடத்திலும் கூறிவிட்டோம், இனி திமுக தலைவா்தான் முடிவெடுக்க வேண்டும் என்றாா் அவா். அப்போது அவரது ஆதரவாளா்கள் திமுகவினருக்கு எதிராக கோஷங்களை எழுப்பினா்.

இதேபோல புன்னம்சத்திரம் பேரூராட்சி துணைத்தலைவா் தோ்தலும் போதிய உறுப்பினா்கள் வராததால் ஒத்திவைக்கப்பட்டது.