புதுக்கோட்டையில் ‘ஏற்றுமதியாளா் சங்கமம்’

மத்திய அரசின் வெளிநாட்டு வா்த்தக இயக்குநரகம் மற்றும் புதுக்கோட்டை மாவட்டத் தொழில் மையம் ஆகியவற்றின் சாா்பில் ‘ஏற்றுமதியாளா் சங்கமம்’ கண்காட்சி மற்றும் கருத்தரங்க நிகழ்ச்சி வெள்ளிக்கிழமை நடைபெற்றது.

மாவட்ட ஆட்சியரகத்தில் நடைபெற்ற நிகழ்ச்சியை மாவட்ட ஆட்சியா் கவிதா ராமு தலைமை வகித்து தொடங்கி வைத்தாா்.

புதுக்கோட்டை லெணாவிளக்கு பகுதியைச் சோ்ந்த சிற்பக் கலைஞா்களின் சிலைகள், பாரி நிறுவனத்தினரின் ஸ்பைருலினா, ரித்திக் இம்பெஸ் நிறுவனத்தின் வீட்டு உபயோகத் துணிகள், விராலிமலை பகுதியைச் சோ்ந்த எஸ்ஆா்எப், எம்எம்எப், சன்மாா் நிறுவனங்களின் பொறியியல் தயாரிப்புகள், ஏஜெ அக்ரோ நிறுவனத்தினரின் தென்னை நாா்க் கழிவுகளைக் கொண்டு தயாரிக்கப்பட்ட மாடித்தோட்ட உபகரணங்கள், சேந்தன்குடி தென்னை உற்பத்தியாளா் கூட்டமைப்பின் தேங்காய் எண்ணெய் ஆகியவை காட்சிக்கு வைக்கப்பட்டிருந்தன.

இதுபோன்ற ஏற்றுமதி தரமுள்ள பொருள்களைத் தயாரிப்போா் தங்களின் விவரங்களை மாவட்ட நிா்வாகத்திடம் பதிவு செய்து கொண்டால் எதிா்காலத்தில் அவற்றை மக்களிடம் கொண்டு செல்ல முயற்சி மேற்கொள்ளப்படும் என்றாா் ஆட்சியா்.

தொடா்ந்து நடைபெற்ற கருத்தரங்கில் மாவட்டத் தொழில் மையப் பொதுமேலாளா் திரிபுரசுந்தரி, மாவட்ட முன்னோடி வங்கி மேலாளா் ரமேஷ், நபாா்டு வங்கி வளா்ச்சி மேலாளா் ஜெயஸ்ரீ, குறு, சிறு மற்றும் நடுத்தரத் தொழில் நிறுவனங்களின் சங்கத் தலைவா் ராஜ்குமாா் உள்ளிட்டோா் பேசினா்.