631 மாணவா்களுக்கு இலவச மிதிவண்டிகள்

திருமயம் ஒன்றியப் பகுதிகளில் 631 மாணவ, மாணவிகளுக்கு தமிழ்நாடு அரசின் விலையில்லா மிதிவண்டிகள் வியாழக்கிழமை வழங்கப்பட்டன.

மாநில சட்டத் துறை அமைச்சா் எஸ். ரகுபதி இந்த மிதிவண்டிகளை வழங்கினாா். குழிபிறை மு.சி.த. ராமநாதன் செட்டியாா் மேல்நிலைப் பள்ளி, கோனாப்பட்டு ஸ்ரீ சரஸ்வதி மேல்நிலைப் பள்ளி, திருமயம் அரசு பெண்கள் மேல்நிலைப் பள்ளி, அரசு மேல்நிலைப் பள்ளி, லெம்பலக்குடி அரசு மேல்நிலைப் பள்ளி ஆகியவற்றில் பயிலும் மாணவ, மாணவிகளுக்கு மிதிவண்டிகள் வழங்கப்பட்டன.

மேலும், கோனாப்பட்டு ஊராட்சியில் சட்டப்பேரவை உறுப்பினரின் தொகுதி மேம்பாட்டு நிதியில் இருந்து ரூ. 7 லட்சம் மதிப்பில் கட்டப்பட்ட கலையரங்கத்தையும் அமைச்சா் எஸ். ரகுபதி திறந்துவைத்தாா்.

நிகழ்ச்சியில், வருவாய்க் கோட்டாட்சியா் பா. ஐஸ்வா்யா, மாவட்டக் கல்வி அலுவலா் (பொ) ஜெயராஜ் உள்ளிட்டோரும் பங்கேற்றனா்.