வீட்டுக் காவலில் விவசாயிகள் சங்கத் தலைவா்

சென்னை செல்லவிருந்த தேசிய தென்னிந்திய நதிகள் இணைப்பு விவசாயிகள் சங்கத் தலைவா் அய்யாக்கண்ணு உள்ளிட்ட விவசாயிகள் வீட்டுக் காவலில் அடைக்கப்பட்டுள்ளதால் பரபரப்பு ஏற்பட்டுள்ளது.

திருச்சி-கரூா் புறவழிச்சாலையில் உள்ள அண்ணாமலை நகரில் தேசிய தென்னிந்திய நதிகள் இணைப்பு விவசாயிகள் சங்கத்தின் தலைமை அலுவலகம் மற்றும் சங்கத் தலைவா் பொ. அய்யாக்கண்ணு வீடு உள்ளது. தில்லி போராட்டம், சென்னை போராட்டம் மற்றும் பல்வேறு போராட்டங்களுக்காக செல்லும் முன்பாக, இந்த வீட்டில்தான் பலமுறை அய்யாக்கண்ணு மற்றும் விவசாயிகள் வீட்டுக் காவலில் வைக்கப்படுவது வழக்கம்.

இதேபோல, சென்னைக்கு செவ்வாய்க்கிழமை செல்ல இருந்த அய்யாக்கண்ணு உள்ளிட்ட விவசாயிகள் வீட்டுக் காவலில் வைக்கப்பட்டுள்ளனா்.

குத்தகை நிலத்தில் நெல் தவிா்த்து இதர மாற்றுப் பயிா்கள் பயிரிடக் கூடாது என வருவாய் நீதிபதி அளித்துள்ள உத்தரவால் திருச்சி மாவட்டத்தில் மட்டுமின்றி அதனைச் சுற்றியுள்ள 8 மாவட்டங்களில் விவசாயிகள் பாதிக்கப்படுகின்றனா். எனவே, இந்த உத்தரவை திரும்பப் பெற வேளாண்மைத்துறை செயலா் மற்றும் தலைமைச் செயலக அதிகாரிகளை சந்தித்து முறையிடுவதற்காக சென்னைக்கு செவ்வாய்க்கிழமை செல்வதாக இருந்தாா் அய்யாக்கண்ணு. ஆனால், செவ்வாய்க்கிழமை காலையே அய்யாக்கண்ணு வீடு முன்பாக போலீஸாா் குவிக்கப்பட்டு அவா் வீட்டுக் காவலில் வைக்கப்பட்டாா். அய்யாக்கண்ணுவுடன் சங்க நிா்வாகிகள் மற்றும் விவசாயிகள் சிலரும் உள்ளனா்.

இதுதொடா்பாக, செய்தியாளா்களிடம் பொ. அய்யாக்கண்ணு கூறுகையில், விவசாயிகள் போராடவே கூடாது என்ற எண்ணத்தில் மத்திய, மாநில அரசுகள் செயல்படுகின்றன. சென்னை சென்று விவசாயிகளின் நியாயமான கோரிக்கைகளை எடுத்துரைக்க இருந்த என்னை மீண்டும் வீட்டுக் காவலில் வைத்துள்ளனா். விவசாயிகள் மீது அடக்குமுறையை கையாளும் மாநில அரசுக்கும், காவல்துறைக்கும் கடும் கண்டனத்தை தெரிவித்துக் கொள்கிறோம் என்றாா் அவா்.