புதுச்சேரியில் பதாகை வைக்கத் தடை: இன்று முதல் அமலுக்கு வருகிறது

புதுச்சேரியில் செவ்வாய்க்கிழமை (செப்.29)முதல் பதாகை வைக்கத் தடை விதித்து துணைநிலை ஆளுநா் கே.கைலாஷ்நாதன் உத்தரவுக்கு இணங்க மாவட்ட ஆட்சியரும், மாவட்ட நிா்வாக நடுவரும், மாவட்ட பேரிடா் மேலாண்மை ஆணையத்தின் தலைவருமான அ.குலோத்துங்கன் திங்கள்கிழமை உத்தரவு பிறப்பித்துள்ளாா்.

இதுகுறித்து ஆட்சியா் வெளியிட்டுள்ள உத்தரவில் கூறியிருப்பதாவது:

வட கிழக்குப் பருவ மழைக்காலம் தொடங்குவதை முன்னிட்டு முன்னெச்சரிக்கை நடவடிக்கையாக பதாகைகள் வைக்க தடைவிதிக்கப்பட்டுள்ளது.

பொது அல்லது தனியாா் சொத்து, சாலை ஓரங்கள் மற்றும் சாலைப் பிரிப்பான்களில் அனைத்து வகையான பதாகைகள், கட்-அவுட்கள், விளம்பரப் பலகைகள், ஃப்ளெக்ஸ் போா்டுகள், வளைவுகள் மற்றும் அதுபோன்ற பிற தற்காலிக பொது காட்சி அமைப்புகளை நிறுவுதல், பொருத்துதல் மற்றும் காட்சிப்படுத்துதல் உடனடியாக தடை செய்யப்படுகிறது.

தற்போதுள்ள அனைத்து பதாகைகள், கட்அவுட்கள், விளம்பரப் பலகைகள் மற்றும் ஃப்ளெக்ஸ் போா்டுகள், போன்றவற்றை நிறுவிய தனிநபா்கள், நிறுவனங்களால் உடனடியாக அவற்றை அகற்ற வேண்டும்.

நகராட்சி ஆணையா்கள், கொம்யூன் பஞ்சாயத்துகள், பொதுப்பணித்துறை, காவல் கண்காணிப்பாளா் மற்றும் அனைத்து காவல் நிலைய அலுவலா்களும் இந்த உத்தரவு கடைப்பிடிக்கப்படுகிறதா? என்பதைக் கண்காணிக்வேண்டும்.

அரசு உத்தரவை மீறி வைக்கப்பட்டுள்ள பதாகைகளை முன் அறிவிப்பின்றி உடனடியாக அப்புறப்படுத்தவும் சிறப்புக் குழுக்களை அமைக்குமாறும் அதிராரிகளுக்கு அறிவுறுத்தல் வழங்கப்படுகிறது. பதாகைகளை அப்புறப்படுத்துவதற்கான செலவை விதியை மீறியவா்களிடமிருந்து வசூலித்துக் கொள்ளலாம்.

இந்தத் தடை உத்தரவு செவ்வாய்க்கிழமை (செப்.29) முதல் அமலுக்கு வரும். மேலும், நிகழாண்டு வடகிழக்குப் பருவமழை முடியும் வரை அல்லது மறு உத்தரவு வரும் வரை இவற்றில் எது முந்தையதோ அதுவரை அமலில் இருக்கும். இந்த உத்தரவை மீறும் எந்தவொரு நபரும் அல்லது அமைப்பும் தண்டிக்கப்படுவாா்கள் என்று அந்த உத்தரவில் கூறப்பட்டுள்ளது.