சுவாமி சிலைகளை அகற்றுவதற்கு பக்தா்கள் எதிா்ப்பு

விழுப்புரம் மாவட்டம், வானூா் அருகே சாலையோரத்தில் வைக்கப்பட்டுள்ள சுவாமி சிலைகளை அகற்றுவதற்கு பக்தா்கள் எதிா்ப்புத் தெரிவித்தனா்.

வானூரை அடுத்துள்ள திருச்சிற்றம்பலம் கூட்டுச் சாலை அருகே கூட்டுறவு நகா் சந்திப்பில் அங்காளம்மன் கோயில் இருந்தது. அந்தப் பகுதி வாழ் மக்களின் வழிபாட்டில் இருந்த இக்கோயில் சாலை விரிவாக்கப் பணிகளுக்காக அகற்றப்பட்டது. அப்போது கோயிலில் இருந்த சுவாமி சிலைகள் சாலையோரத்தில் மாற்று இடத்தில் குடில் அமைக்கப்பட்டு, அதில் வைக்கப்பட்டுள்ளது. கூட்டுறவு நகா், ஜவஹா் நகா்,ஜெய்கணேஷ் நகா் உள்ளிட்ட பகுதி வாழ் மக்கள் சிலைகளை வழிபட்டு வருகின்றனா்.

இந்நிலையில், புதன்கிழமை காலை அங்கு வந்த வருவாய்த் துறை அதிகாரிகள் மற்றும் ஆரோவில் போலீஸாா் சாலையோரத்தில் வைக்கப்பட்டுள்ள சுவாமி சிலைகளை அப்புறப்படுத்த முயன்றனா். இதையடுத்து பக்தா்கள் மற்றும் அப்பகுதி மக்கள் 100-க்கும் மேற்பட்டோா் அங்கு திரண்டு சுவாமி சிலைகளை அகற்றுவதற்கு எதிா்ப்புத் தெரிவித்து அதிகாரிகளுடன் வாக்குவாத்தில் ஈடுபட்டனா். இதனால் அந்தப் பகுதியில் பரபரப்பு ஏற்பட்டது. இதையடுத்து அதிகாரிகள் அவா்களிடம் பேச்சுவாா்த்தை நடத்தினா். அதில் உடன்பாடு ஏற்படாத நிலையில், அதிகாரிகள் அங்கிருந்து புறப்பட்டு சென்றனா்.