கர்நாடகத்தில் காங்கிரஸ்- மஜத கூட்டணி அரசு சிறப்பாக செயல்படுவதாக மஜத மாநிலத் தலைவர் எச்.விஸ்வநாத் தெரிவித்தார்.
கர்நாடக மாநிலம், சித்ரதுர்காவில் திங்கள்கிழமை செய்தியாளர்களிடம் அவர் கூறியது: கர்நாடகத்தில் முதல்வர் குமாரசாமி தலைமையில் காங்கிரஸ்-மஜத கூட்டணி ஆட்சி நடைபெற்று வருகிறது. கடந்த ஒரு மாதமாக மாநில அரசியலில் பல்வேறு குழப்பங்கள் ஏற்பட்டாலும், அதை பொருள்படுத்தாமல் கூட்டணி அரசு சிறப்பாக செயல்பட்டு வருகிறது. 
கூட்டணி ஆட்சியில் ரூ. 48 ஆயிரம் கோடி விவசாய கடன்கள் தள்ளுபடி செய்யப்பட்டுள்ளன. மாநில கட்சிகள் மாநிலத்தை ஆளுவதால், மாநிலத்தின் வளர்ச்சி மேம்படும் என்று மஜத நீண்ட நாள்களாகக் கூறி வருகிறது. மத்திய அரசு  பெட்ரோல், டீசல் விலையைக் குறைக்க மறுத்த நிலையில், மாநில அரசு தானாக முன்வந்து,  பெட்ரோல், டீசல் லிட்டருக்கு 2 ரூபாய் குறைக்கப்பட்டுள்ளது. மாநிலத்தில் உள்ள பிரச்னைகள் தேசிய கட்சிகளைவிட, மாநிலக் கட்சிகளுக்குத்தான் அதிகம் தெரியும். 
தேசிய வங்கிகளில் விவசாயிகளின் கடனை தள்ளுபடி செய்வதில் மத்திய அரசு ஒத்துழைப்பு வழங்காமல் உள்ளது. அனைத்து மாவட்டங்களின் தேவைகளை உணர்ந்து அதற்கேற்ற வளர்ச்சித் திட்டங்களை முதல்வரின் கவனத்துக்கு கொண்டு செல்வோம் என்றார்.