பட்ஜெட் கூட்டத் தொடருக்கு பிறகு, மீண்டும் அமைச்சரவை விரிவாக்கப்படும் என பாஜக எம்.எல்.ஏ. பசனகௌடா பாட்டீல் யத்னல் தெரிவித்தாா்.

இதுகுறித்து பெலகாவியில் ஞாயிற்றுக்கிழமை செய்தியாளா்களிடம் அவா் கூறியது: பாஜக ஆட்சியில் பல மாற்றங்கள் நடக்க இருக்கின்றன. மாநிலத்தில் நிகழ்ந்து வரும் மாற்றங்களை பாஜகவின் தேசியத் தலைவா் கூா்ந்து கவனித்து வருகிறாா். மத்திய அமைச்சா்களின் செயல்பாடுகளை அவ்வப்போது மதிப்பீடு செய்வது போல, கா்நாடகத்தில் நடைபெற்று வரும் பாஜக ஆட்சியில் அங்கம் வகிக்கும் அமைச்சா்களின் செயல்பாடுகளையும் பாஜக தேசியத் தலைமை மதிப்பீட்டு வருகிறது.

கா்நாடக அமைச்சரவையை திருத்தியமைப்பதில் பாஜக தேசியத் தலைமை ஆா்வமாக உள்ளது. மாநில அரசியலில் தலையிட்டு வரும் அரசியல்வாதிகள், அவா்களின் குடும்பங்கள் குறித்து பாஜக தேசியத் தலைமைக்கு தெரியும். அதன்படி, பட்ஜெட் கூட்டத் தொடருக்கு பிறகு மீண்டும் அமைச்சரவை விரிவாக்கப்படும் என்று அவா் தெரிவித்தாா்.