அண்ணா பல்கலைக்கழக பொறியியல் மாணவி பாலியல் வன்கொடுமை தொடா்பான வழக்கில் தமிழக அரசு மற்றும் காவல்துறைக்கு சென்னை உயா்நீதிமன்றம் சரமாரி கேள்வி எழுப்பியதுடன், அறிக்கை தாக்கல் செய்யவும் உத்தரவிட்டது.

அண்ணா பல்கலைக்கழக மாணவி பாலியல் வன்கொடுமை தொடா்பான வழக்கின் விசாரணையை சிபிஐ-க்கு மாற்றக் கோரி வழக்குரைஞா்கள் வரலட்சுமி மற்றும் மோகன்தாஸ் ஆகியோா் தாக்கல் செய்த மனுக்கள் நீதிபதிகள் எஸ்.எம்.சுப்பிரமணியம் மற்றும் வி.லட்சுமி நாராயணன் அடங்கிய அமா்வில் வெள்ளிக்கிழமை விசாரணைக்கு வந்தன.

நடவடிக்கை தேவை: அப்போது மனுதாரா்கள் தரப்பில் ஆஜரான வழக்குரைஞா்கள், வழக்கு தொடா்பான முதல் தகவல் அறிக்கையை காவல்துறையினா் வெளியிட்டது சட்டவிரோதம். முதல் தகவல் அறிக்கை வெளியிடப்பட்டதை காவல் ஆணையரே ஒப்புக்கொண்டுள்ளதால், சம்பந்தப்பட்ட காவல்துறையினா் மீது நடவடிக்கை எடுக்க உத்தரவிட வேண்டும். கைது செய்யப்பட்ட நபா் மீது 20 வழக்குகள் உள்ளதாக காவல் ஆணையா் தெரிவித்துள்ளாா். அந்த நபரின் பின்னணியில் இருப்பவா்கள் யாா் என்பதை விசாரிக்க வேண்டும்.

பாலியல் வன்கொடுமைகளால் பாதிக்கப்பட்ட பெண்களின் பாதுகாப்புக்காகக் கொண்டுவரப்பட்ட சட்டப்பிரிவையும் மீறி முதல் தகவல் அறிக்கை வெளியிடப்பட்டுள்ளது.

இடைக்காலமாக இந்த வழக்கை ஓய்வுபெற்ற நீதிபதி கண்காணிப்பில் சிறப்புப் புலனாய்வு குழுவை அமைத்து விசாரிக்க உத்தரவிட வேண்டும்.”கைது செய்யப்பட்ட நபருக்கு எதிராக இந்த ஒரு பாலியல் வன்கொடுமை வழக்கு மட்டுமே உள்ளதாக காவல் ஆணையா் தெரிவித்துள்ளாா். ஆனால், பல வழக்குகள் உள்ளன. அவற்றையும் விசாரிக்க வேண்டும்”என வாதிட்டனா்.

குற்றவாளி ஒருவா் தானா?: அப்போது குறுக்கிட்ட நீதிபதிகள், புலன் விசாரணை நிலுவையில் உள்ள நிலையில், குற்றவாளி ஒருவா்தான் என்று காவல் ஆணையா் எப்படி முடிவுக்கு வந்தாா் என்றும், கைது செய்யப்பட்டவா் காலில் பேண்டேஜ் ஏன் போடப்பட்டுள்ளது எனவும் கேள்வியெழுப்பினா்.

இதற்கு தமிழக அரசின் தலைமை வழக்குரைஞா் மற்றும் கூடுதல் தலைமை வழக்குரைஞா் ஆகியோா் பதில் அளித்தபோது, பாதிக்கப்பட்ட மாணவி அளித்த புகாரில் கைது செய்யப்பட்டுள்ள நபரின் பெயா் மட்டும்தான் குறிப்பிடப்பட்டுள்ளது என்றுதான் காவல் ஆணையா் கூறியுள்ளாா். கைது செய்யப்பட்ட நபரை விசாரணைக்கு அழைத்துச் சென்றபோது அவா் தப்பி ஓட முயற்சித்ததாகவும் அவரை காவல்துறையினா் விரட்டிச் சென்றபோது தவறி விழுந்து காயம் ஏற்பட்டதாகவும் விளக்கம் அளிக்கப்பட்டது.

விரிவான அறிக்கைக்கு...: இதையடுத்து, அரசு அதிகாரிகள் நடத்தை விதிகளில் பத்திரிகையாளா்களைச் சந்திக்கும் முன்பு, அரசு அனுமதி பெற வேண்டுமா என்பது குறித்தும் முதல் தகவல் அறிக்கை வெளியானது குறித்தும், அதற்கு யாா் பொறுப்பு என்பது குறித்தும் விரிவான அறிக்கையை தாக்கல் செய்ய தமிழக அரசுக்கும், காவல்துறைக்கும் நீதிபதிகள் உத்தரவிட்டனா்.

இதேபோல மாணவிகள் பாதுகாப்புக்கு அண்ணா பல்கலை. என்ன நடவடிக்கை எடுத்துள்ளது? நிா்பயா நிதிச் செலவு செய்யப்பட்ட விவரம் குறித்தும் அறிக்கை அளிக்க வேண்டும் எனவும், பல்கலை. விசாகா குழுவில் எத்தனை புகாா்கள் வந்துள்ளன என்பது குறித்தும் அறிக்கை அளிக்க அண்ணா பல்கலை.க்கு உத்தரவிட்ட நீதிபதிகள் விசாரணையை சனிக்கிழமைக்கு ஒத்திவைத்தனா்.

மாணவிக்கு பாராட்டு...: முன்னதாக, பாதிக்கப்பட்ட மாணவி தைரியமாக புகாா் அளிக்க முன்வந்ததற்கு பாராட்டு தெரிவித்த நீதிபதிகள், அவரைப் பாதுகாக்க வேண்டியது நமது கடமை எனவும், குற்றவாளி 10 ஆண்டுகள் அண்ணா பல்கலை. வளாகத்தில் உலவி வருகிறாா். அதை விசாரித்தீா்களா எனவும் கேள்வி எழுப்பினா். பெண்கள் ஆண்களுடன் பேசக் கூடாது, பாதிக்கப்பட்ட மாணவி அங்குச் சென்றிருக்கக் கூடாது என்றெல்லாம் பேசக்கூடாது”எனத் தெரிவித்த நீதிபதிகள், பெண்களுக்கு முழுச் சுதந்திரம் உள்ளது; காதல் என்பது பெண்ணின் தனிப்பட்ட சுதந்திரம் எனவும் சுட்டிக்காட்டினா்.