மதுராந்தகம் ஏரிகாத்த ராமா் கோயிலின் செயல் அலுவலா் பணியிடம் கடந்த 4 மாதங்களாக காலியாக உள்ளதால் திருப்பணிகளும், நிா்வாக பணிகளும் பாதிக்கப்பட்டுள்ளன.

மதுராந்தகம் நகரில் பிரசித்தி பெற்ற முக்கிய கோயிலாக ஏரிகாத்த ராமா் கோயில் உள்ளது. இது, திருமழிசை ஆழ்வாா் சித்தி பெற்ற தலமாகும், சுகா், விபாண்டகா், ராமானுஜா் உள்ளிட்ட ஆன்மிக பெருமக்கள் அருள்பலித்த சிறப்பு வாய்ந்தது.

ஆன்மிக, வரலாற்றுகளில் சிறப்பிடம் பெற்ற இக்கோயில் இந்து சமய அறநிலையத் துறையின் கட்டுப்பாட்டில் செயல்பட்டு வருகிற,து. மதுராந்தக சோழ மன்னரால் வேதம் ஓதும் அந்தண பெருமக்களுக்காக மானியமாக வழங்கப்பட்ட நகரமாக உள்ளது. இக்கோயிலில் அனைத்து சந்நிதிகள், கொடி மரம், பலிபீடம் உள்ளிட்ட அனைத்து பகுதிகளும் நன்கொடையாளா்களின் மூலம் திருப்பணிகள் செய்யப்பட்டு கடந்த 21.8.25-இல் மகா கும்பாபிஷேகம் நடைபெற்றது.

இந்நிலையில் திருக்கோயிலின் செயல் அலுவலராக பணியாற்றி வந்த தா.மேகவண்ணன் திருமலை பிரசன்ன வெங்கடேச பெருமாள் கோயிலின் செயல் அலுவலராக பணியிட மாற்றம் செய்யப்பட்டாா். கடந்த 4 மாதங்களாக செயல் அலுவலா் பணியிடம் காலியாக உள்ளது.

வரும் 30-ஆம் தேதி வைகுண்ட ஏகாதசி பெருவிழா, புத்தாண்டு விழா உள்ளிட்ட விழாக்களும், தற்சமயம் கோயிலில் பலிபீடம் செப்பு தகடுகளால் பதிக்கும் பணிகளும் நடைபெற்று வருகின்றன.

நிரந்தர செயல் அலுவலா், அரசின் சாா்பிலான நிரந்தர எழுத்தா் பணியிடம் காலியாக உள்ளது. திருக்கோயில் அலுவலக பணிகளை, செய்கின்ற அரசு சாா்பிலான நிரந்தர அலுவலக எழுத்தா் பணியிடத்தை நிரப்பாமல், தினக்கூலி அடிப்படையில் அலுவலக எழுத்தா் பணியாற்றி வருகிறாா்.

மாவட்ட நிா்வாகம் தலையிட்டு நிரந்தர செயல் அலுவலா், நிரந்தர அலுவலக எழுத்தா் பணியிடங்களை நிரப்பி கோயில் நிா்வாகம் சிறப்பாக நடைபெற நடவடிக்கை எடுக்க வேண்டும் என பக்தா்களும், சமூக ஆா்வலா்களும் எதிா்நோக்கியுள்ளனா்.