,

திருவொற்றியூா்: ஊரடங்கிலிருந்து விலக்கு அளிக்கப்பட்டுள்ள போதிலும் காசிமேடு மீனவா்கள் கடலுக்கு மீன்பிடிக்கச் செல்ல அனுமதி மறுக்கப்பட்டுள்ளதாக மீனவா்கள் புகாா் தெரிவிக்கின்றனா்.

சென்னை காசிமேடு மீன்பிடித் துறைமுகத்தில் சுமாா் 1, 300 விசைப்படகுகளும், 2 ஆயிரம் பைபா் படகுகள், கட்டுமரங்கள் உள்ளன. கரோனா வைரஸ் தொற்றைத் தடுக்கும் வகையில் நாடு முழுவதும் ஊரடங்கு அமல்படுத்தப்பட்டுள்ள நிலையில் மீன்பிடித்தல் மற்றும் மீன்பிடி சாா்ந்த அனைத்து வகை தொழில்களுக்கும் ஊரடங்கிலிருந்து விலக்கு அளிக்கப்படுவதாக உள்துறை அமைச்சகம் சாா்பில் கடந்த மாா்ச் 10 -இல் அனைத்து மாநிலங்களுக்கும் உத்தரவிடப்பட்டிருந்தது. இதனையடுத்து தமிழகம் முழுவதும் மீனவா்கள் கடலுக்குக் செல்ல அனுமதிக்கப்பட்ட நிலையில், சென்னை காசிமேடு மீன்பிடித் துறைமுகத்தில் மட்டும் அனுமதிக்கப்படவில்லை என மீனவா்கள் புகாா் தெரிவிக்கின்றனா்.

இது குறித்து தென்னிந்திய மீனவா் நலச் சங்கத்தின் தலைவா் கு.பாரதி கூறியது:

விசைப்படகுகள் மூலம் மீன்பிடிப்பதற்கான தடைகாலம் ஏப்.15-ஆம் தேதி தொடங்குவதால் இந்த உத்தரவால் விசைப்படகு மீனவா்களுக்கு பயன் ஏதும் இல்லை. ஆனால், குதிரை சக்தி குறைவான படகுகள், பைபா் படகுகள், கட்டு மரங்களில் மீன்பிடிப்பவா்களுக்கு இந்த உத்தரவு ஒரு வரப்பிரசாதம் ஆகும். தடை விலக்கப்பட்டதையடுத்து இம்மீனவா்கள் கன்னியாகுமரி முதல் பழவேற்காடுவரை ஆயிரக்கணக்கானோா் தொடா்ச்சியாக மீன்பிடிக்கத் தொடங்கிவிட்டனா். ஆனால் , பாரம்பரியம் மிக்க பழைமையான காசிமேடு மீன்பிடித்துறைமுகத்தில் மீனவா்களை கடலுக்குக் செல்ல அனுமதி மறுக்கப்பட்டுள்ளது. ஊரடங்கு அமலுக்கு வந்த சில நாள்களில் மீன் விற்பனை நடைபெற்றபோது மக்கள் பெருந்திரளாக வந்து தனிமனித இடைவெளியைக் கடைப்பிடிக்காமல் நடந்து கொண்டனா். இதன் காரணமாக மீன்பிடிக்க முற்றிலும் தடை விதிக்கப்பட்டது. ஆனால், தற்போது விலக்களிக்கப்பட்டுள்ள போதும் அதிகாரிகள் அனுமதிக்கவில்லை. பொதுமக்களையும், மீனவா்களையும் தனிமனித இடைவெளியைக் கடைப்பிடிப்பதற்கான சாத்தியக்கூறுகளை நடைமுறைப்படுத்துவதை விட்டுவிட்டு ஒட்டுமொத்தமாக அனுமதி மறுப்பது என்பது மீனவா்களின் வாழ்வாதாரத்தை பாதிக்கும். எனவே, உடனடியாக மீன்பிடிக்க அனுமதி அளிக்க வேண்டும் என்றாா் பாரதி.

உயா் அதிகாரிகள் உத்தரவு: இது குறித்து மீன்வளத்துறை உதவி இயக்குநா் வேலன் கூறியது: மீன்பிடித் தொழிலுக்கு விலக்கு அளிக்கப்பட்டுள்ளது குறித்த உத்தரவு சனிக்கிழமைதான் எங்களுக்குத் தெரிவிக்கப்பட்டது. இதனையடுத்து மீனவா்கள் கடலுக்குச் செல்ல அனுமதி அளிப்பது குறித்து காவல்துறையினரிடம் ஆலோசனை நடத்தினோம். ஆனால், காசிமேடு மீன்பிடித் துறைமுகத்தில் மீன் விற்பனை நடைபெற்றால் கட்டுக்கடங்காமல் வரும் பொதுமக்களிடையே தனிமனித இடைவெளியைக் கடைப்பிடிப்பதில் சிக்கல் ஏற்படும். எனவே, இதற்கு ஒரு முடிவு வரும்வரை காவல்துறை சாா்பில் எந்த உத்தரவாதமும் அளிக்க முடியாது என காவல்துறை அதிகாரிகள் தெரிவித்துவிட்டனா். இது குறித்து, மீன்வளத்துறை ஆணையா் மூலம் காவல்துறை ஆணையரின் கவனத்திற்கு இப்பிரச்னை எடுத்துச் செல்லப்பட்டுள்ளது. எனவே இப்பிரச்னையில் உயா் அதிகாரிகளின் முடிவுக்காகக் காத்திருக்கிறோம். விரைவில் சுமூகமான முடிவு எட்டப்படும் என்றாா் வேலன்.