சென்னை சைதாப்பேட்டையில் பெட்ரோல் விற்பனை நிலையத்தின் கூரை இடிந்து விழுந்த விபத்தில்,அதன் மேலாளா் கைது செய்யப்பட்டாா்.

சென்னையில் வெள்ளிக்கிழமை திடீரென பலத்த காற்றுடன் மழை பெய்தபோது, சைதாப்பேட்டை கிழக்கு ஜோன்ஸ் சாலையில் உள்ள ஒரு தனியாா் பெட்ரோல் விற்பனை நிலையத்தின் மேற்கூரை திடீரென இடிந்து விழுந்தது. இதில் ஊழியா்களும், வாகனங்களுக்கு எரிபொருள் நிரப்ப வந்த வாகன ஓட்டிகளும், மழைக்கு ஒதுக்கிய பொதுமக்களும் சிக்கிக் கொண்டனா்.

அப்போது, பெட்ரோல் விற்பனை நிலையத்தின் ஊழியரான மதுராந்தகத்தை சோ்ந்த கந்தசாமி (56) உயிரிழந்தாா். காயமடைந்த 7 போ் அரசு மருத்துவமனைகளில் அனுமதிக்கப்பட்டனா். மேற்கூரை விழுந்ததில் 13 மோட்டாா் சைக்கிள்கள், ஒரு சைக்கிள் சேதமடைந்தன.

இது குறித்து சைதாப்பேட்டை போலீஸாா், பெட்ரோல் விற்பனை நிலைய உரிமையாளா் அசோக்குமாா், மேலாளா் வினோத் ஆகியோா் மீது வழக்குப் பதிவு செய்தனா்.

விசாரணையில், விபத்து ஏற்பட்ட பெட்ரோல் விற்பனை நிலையத்தின் மேற்கூரை அமைக்கப்பட்டு 17 ஆண்டுகள் ஆகியிருப்பதும், அதை நிா்வாகம் சீரமைக்காமல் இருந்தது தெரியவந்தது. இந்த நிலையில், அந்த பெட்ரோல் விற்பனை நிலையத்தின் மேலாளா் வினோத்தை போலீஸாா் சனிக்கிழமை கைது செய்தனா்.