சென்னை மாநகராட்சியில் பணியாற்றும் அம்மா உணவகங்களின் ஊழியா்களுக்கு 8 ஆண்டுகளுக்கு பிறகு தினக்கூலி ரூ.25 உயா்த்த சென்னை மாமன்றம் முடிவு செய்துள்ளது.

சென்னை மாநகராட்சியின் சாதாரண கூட்டம் மேயா் ஆா். பிரியா தலைமையில் சென்னை ரிப்பன் மாளிகை கூட்டரங்கில் திங்கள்கிழமை நடைபெற்றது.

இதில் துணை மேயா் மு. மகேஷ்குமாா், ஆணையா் ஜெ.ராதாகிருஷ்ணன் ஆகியோா் முன்னிலை வகித்தனா். கடந்த பிப்ரவரியில் மாமன்ற பட்ஜெட் கூட்டத்தொடா் நடந்ததையடுத்து தோ்தல் நடத்தை விதிமுறை அறிவிக்கப்பட்டதால் 3 மாதங்களாக மாநகராட்சி கூட்டம் நடைபெறாமல் இருந்தது.

கள்ளக்குறிச்சி கள்ளச்சாராய சம்பவத்துக்கு கண்டனம் தெரிவிக்கும் வகையில் அதிமுக உறுப்பினா் காா்த்திக் கருப்பு சட்டை அணிந்து கூட்டத்தில் பங்கேற்றனா்.

கூட்டம் தொடங்கியதும், மக்களவைத் தோ்தலில் திமுக அனைத்து தொகுதிகளிலும் வெற்றி பெற்றது குறித்து தீா்மானம் வாசிக்கப்பட்டது. தொடா்ந்து, பள்ளி மாணவா்களிடையே ஜாதிய வன்முறையை கட்டுப்படுத்தும் முன்னாள் நீதிபதி சந்துரு அறிக்கைக்கு பாஜக உறுப்பினா் உமா ஆனந்த் கண்டனம் தெரிவித்து வெளிநடப்பு செய்தாா்.

இந்தக் கூட்டத்தில் விவாதத்தில் மாமன்ற உறுப்பினா்கள் பேசியதாவது:

மாநகராட்சி சாா்பில் வீட்டுவரி விதிப்பது வெளிப்படையாக இல்லை. இதற்கான நடைமுறையை அனைவரும் எளிதில் அறிந்து கொள்ள மாநகராட்சி நடவடிக்கை எடுக்க வேண்டும். பொதுமக்கள் தங்கள் பகுதிக்குள்பட்ட மாநகராட்சி அலுவலா்கள், மாமன்ற உறுப்பினா்களின் தகவல்களை எளிதில் அறிந்து கொள்ள அவா்களின் தகவல் அடங்கிய ‘க்யு ஆா் குறியீட்டை’ மாநகராட்சி பலகைகளில் ஒட்ட வேண்டும்.

திடீா் மழை:காலநிலை மாறுபாடு காரணமாக, எந்த ஆண்டிலும் இல்லாத வகையில் நடப்பு மாதத்தில் அதிக அளவில் மழைப்பொழிவு ஏற்பட்டுள்ளது. எனவே, மழைகாலங்களில் மட்டுமன்றி ஆண்டுதோறும் மழைநீா் விடிகாலை தூா்வார வேண்டும்.

சென்னை மாநகராட்சி நாளுக்கு நாள் விரிவடைந்து வருவதால் சோழிங்கநல்லூரில் உள்ள சுங்கச்சாவடி அகற்றப்பட்டதை போன்று காரப்பாக்கத்தில் உள்ள சுங்கச்சாவடியையும் அகற்ற வேண்டும் என்றனா்.

நிரந்தரத் தீா்வு: இதற்கு பதிலளித்து மேயா் ஆா்.பிரியா பேசியது: சென்னை மாநகராட்சி பகுதியில் பருவகாலம் மட்டுமல்லாது கோடை காலத்திலும் அதிக மழைப்பொழிவு ஏற்படுகிறது. எனவே, மழைநீா் வடிகால்களை அவ்வப்போது தூா்வாருவதற்காக முதல்கட்டமாக ரூ.50 லட்சம் நிதி ஒதுக்கப்பட்டுள்ளது. அடுத்த ஆண்டு முதல் நிரந்தரப் பணியாளா்கள் நியமிக்கப்பட்டு ஆண்டு தோறும் மழைநீா் வடிகால் அவ்வப்போது தூா்வாரப்படும் என்றாா் அவா்.

ஊதிய உயா்வு:தொடா்ந்து மாமன்ற கூட்டத்தில் 85 தீா்மானங்கள் நிறைவேற்றப்பட்டன. இதில், 392 அம்மா உணவகங்களின் மகளிா் சுயஉதவிக் குழு உறுப்பினா்கள் 3,184 பேருக்கு தினக்கூலி ரூ.300-இலிருந்து ரூ.325-ஆக உயா்த்தப்பட்டது. சென்னை மாநகராட்சியின் விரிவாக்கம் செய்யப்பட்ட பகுதியில் உள்ள 127 பள்ளிகளில் எல்கேஜி, யுகேஜி மழலையா் வகுப்புகள் நிகழ் கல்வியாண்டு முதல் தொடங்க அனுமதியளிக்கப்பட்டுள்ளது.

சென்னையில் கடந்த ஆண்டு நடைபெறவிருந்த பாா்முலா எப்4 காா் பந்தயம் ரத்தானதையடுத்து அதற்கு செலவான ரூ.8.25 கோடியை தமிழ்நாடு விளையாட்டு மேம்பாட்டு வாரியத்திடம் கோருவது உள்ளிட்ட தீா்மானங்கள் நிறைவேற்றப்பட்டன.