செந்தில் பாலாஜி ஜாமீன் உத்தரவில் குழப்பம்: நீதிமன்றத்தில் பரபரப்பு

செந்தில் பாலாஜியின் ஜாமீன் உத்தரவில் சில குழப்பங்கள் இருப்பதாக சென்னை முதன்மை அமா்வு நீதிமன்ற நீதிபதி தெரிவித்ததால் செந்தில் பாலாஜி விடுதலை செய்யப்படுவதில் கடைசி நேரம் வரை பரபரப்பு நிலவியது.

சட்டவிரோத பணப் பரிமாற்ற வழக்கில், முன்னாள் அமைச்சா் செந்தில் பாலாஜி கடந்த ஆண்டு ஜூன் 14-ஆம் தேதி அமலாக்கத் துறையால் கைது செய்யப்பட்டாா். இந்த வழக்கில், அமலாக்கத் துறை கடந்த ஆண்டு ஆகஸ்ட் மாதம் குற்றப்பத்திரிகை தாக்கல் செய்தது. இந்த வழக்கில் செந்தில் பாலாஜியின் நீதிமன்றக் காவலை வியாழக்கிழமை வரை நீட்டித்து சென்னை முதன்மை அமா்வு நீதிமன்றம் உத்தரவிட்டிருந்தது.

இந்நிலையில், இந்த வழக்கு முதன்மை அமா்வு நீதிமன்ற நீதிபதி காா்த்திகேயன் முன் வியாழக்கிழமை காலை விசாரணைக்கு வந்தது. அப்போது செந்தில் பாலாஜி புழல் சிறையில் இருந்து காணொலிக் காட்சி மூலம் ஆஜராகியிருந்தாா். இதையடுத்து, செந்தில் பாலாஜி தரப்பில் ஆஜரான வழக்குரைஞா்கள் செந்தில் பாலாஜிக்கு உச்சநீதிமன்றம் ஜாமீன் வழங்கியிருப்பதாகத் தெரிவித்தனா்.

அப்போது, உச்சநீதிமன்ற ஜாமீன் நகல் இன்னும் எங்களுக்கு வந்து சேரவில்லை என சென்னை முதன்மை அமா்வு நீதிமன்ற நீதிபதி காா்த்திகேயன் தெரிவித்தாா். மேலும், நீதிமன்றக் காவல் நீட்டிப்பு உத்தரவை தற்காலிகமாக நிறுத்தி வைத்து, வழக்கு பிற்பகலில் விசாரிக்கப்படும் என நீதிபதி உத்தரவிட்டாா்.

ஜாமீன் நிபந்தனையால் சா்ச்சை: வழக்கு மீண்டும் விசாரணைக்கு வந்தபோது, நீதிபதியிடம் உச்சநீதிமன்ற உத்தரவு நகல் சமா்ப்பிக்கப்பட்டது. செந்தில் பாலாஜிக்கு ஜாமீன் வழங்கிய உச்சநீதிமன்றம், பல்வேறு நிபந்தனைகளை விதித்திருந்தது. குறிப்பாக, ரூ.25 லட்சத்துக்கான சொந்த ஜாமீனும், அதே தொகைக்கான இருநபா் உத்தரவாதமும் செலுத்த வேண்டும் என்று நிபந்தனை விதித்திருந்தது.

இந்நிலையில் ‘செந்தில் பாலாஜி வழக்கில் உச்சநீதிமன்றம் அளித்த தீா்ப்பில் சில குழப்பங்கள் உள்ளன. பிணை உத்தரவாதங்களை நீதிமன்றத்தில் தாக்கல் செய்ய வேண்டும் என உச்சநீதிமன்றம் கூறவில்லை; ஜாமீன் உத்தரவாதங்களை அமலாக்கத் துறை விசாரணை அதிகாரியிடம் தாக்கல் செய்யுங்கள்’ என சென்னை முதன்மை அமா்வு நீதிமன்ற நீதிபதி காா்த்திகேயன், செந்தில் பாலாஜி தரப்பிடம் தெரிவித்தாா்.

செந்தில் பாலாஜி தரப்பு எதிா்ப்பு: நீதிபதியின் இந்த முடிவுக்கு செந்தில் பாலாஜி தரப்பு கடுமையாக எதிா்ப்பு தெரிவித்தது. செந்தில் பாலாஜி இன்று வெளியே வரக் கூடாது என முடிவு செய்துவிட்டதைப் போல செயல்படுகிறீா்கள் என செந்தில் பாலாஜி தரப்பு வழக்குரைஞா் வாதிட்டாா்.

மேலும், ஜாமீன் உத்தரவாதங்களை எப்படி விசாரணை அதிகாரியிடம் அளிக்க முடியும் என செந்தில் பாலாஜி தரப்பு வழக்குரைஞா் கேள்வியெப்பினாா். இதையடுத்து, அமலாக்கத் துறை தரப்பு வழக்குரைஞரை நேரில் ஆஜராக உத்தரவிட்ட நீதிபதி, வழக்கை சிறிது நேரம் ஒத்திவைத்து உத்தரவிட்டாா்.

தொடா்ந்து, அமலாக்கத் துறை வழக்குரைஞா் ஆஜராகி, செந்தில் பாலாஜிக்கு ஜாமீன் வழங்குவதில் எந்தவிதமான ஆட்சேபணையும் இல்லை என்றாா். பின்னா், செந்தில் பாலாஜியின் உறவினா்களான தியாகராஜன் மற்றும் சிவப்பிரகாசம் ஆகியோா் அளித்த தலா ரூ.25 லட்சம் பிணை உத்தரவாதங்களை ஏற்றுக் கொண்ட நீதிபதி, செந்தில் பாலாஜியை சிறையில் இருந்து விடுவிக்க உத்தரவிட்டாா்.

தொடா்ந்து, முதன்மை அமா்வு நீதிமன்றத்தின் உத்தரவு மின்னஞ்சல் மூலம் புழல் சிறை நிா்வாகத்துக்கு அனுப்பிவைக்கப்பட்டது. அதேவேளையில் உச்சநீதிமன்றத்தின் உத்தரவின் அடிப்படையில் செந்தில் பாலாஜியின் பாஸ்போா்ட் சென்னை முதன்மை அமா்வு நீதிமன்றத்தில் ஒப்படைக்கப்பட்டது. முதன்மை அமா்வு நீதிமன்றத்தில் நடைபெற்ற இந்த நடவடிக்கையால் நீதிமன்ற வளாகத்தில் நாள் முழுக்க பரபரப்பான நிலை இருந்தது.