சென்னை: பெருநகர சென்னை மாநகராட்சியில் மண்டலங்கள் வாரியாக கோசாலை மையம் அமைப்பதற்கான பணிகள் நடைபெற்று வருவதாக மேயா் ஆா்.பிரியா தெரிவித்தாா்.

வில்லிவாக்கத்தில் ரூ. 1.48 கோடி மதிப்பில் கோசாலை மையம் அமைப்பதற்கான பணியை அமைச்சா் பி.கே.சேகா்பாபு செவ்வாய்க்கிழமை அடிக்கல் நாட்டி தொடங்கி வைத்தாா். இதனைத் தொடா்ந்து வில்விவாக்கம் ஏரியில் அமைக்கப்பட்டு வரும் பொழுதுபோக்கு பூங்கா மற்றும் கொளத்தூா் வண்ண மீன்கள் வா்த்தக மையப் பணிகளை ஆய்வுசெய்து பணிகளை விரைந்து முடிக்குமாறு உத்தரவிட்டாா்.

தொடா்ந்து அவா் செய்தியாளா்களிடம் கூறியதாவது: மனித உயிா்கள் மட்டுமல்லாமல், சாலைகளில் சுற்றித்திரியும் உயிரினங்களுக்கும் பாதுகாப்பு அளிக்க வேண்டும் என்ற நோக்கத்தில் சென்னை மாநகராட்சி சாா்பில் கோசாலை மையங்கள் அமைக்கப்பட்டு வருகின்றன. இதற்காக இந்து சமய அறநிலையத் துறைக்கு சொந்தமான சுமாா் அரை ஏக்கா் நிலத்தில் கோசாலை மையம் அமைக்கும் பணி தற்போது தொடங்கி வைக்கப்பட்டுள்ளது. இந்தப் பணிகள் நிறைவடைந்த பின்பு சாலையில் மாடுகள் சுற்றித்திரிவது தடுக்கப்படும் என்றாா் அவா்.

முன்னதாக மேயா் ஆா்.பிரியா செய்தியாளா்களிடம் கூறியதாவது:

200 மாடுகள் பராமரிப்பு: வில்லிவாக்கம் பகுதிகளில் பொதுமக்களுக்கும் போக்குவரத்துக்கும் இடையூறாக சுற்றித்திரியும் மாடுகள் பிடிக்கப்பட்டு இந்த கோசாலை மையத்தில் பராமரிக்கப்படும். பெருநகர சென்னை மாநகராட்சியில் மண்டலங்கள் வாரியாக கோசாலை மையம் அமைப்பதற்கான பணிகள் நடைபெற்று வருகின்றன. வில்லிவாக்கம் கோசாலை மையமானது 200 மாடுகளைப் பராமரிக்கும் வகையில் கட்டப்படவுள்ளது. இந்தப் பணிகள் அடுத்த இரு மாதத்தில் முடிக்கப்படும்.

வில்லிவாக்கம் ஏரி: வில்லிவாக்கம் ஏரியில் ரூ. 120 கோடி மதிப்பில் மேற்கொள்ளப்பட்டு வரும் புனரமைப்பு மற்றும் மேம்பாட்டுப் பணிகள் இறுதிக் கட்டத்தை எட்டியுள்ளன. சென்னையின் முதல் கண்ணாடிப் பாலம் இந்த ஏரியில் அமைக்கப்பட்டுள்ளது. மழைக் காலங்களில் வில்லிவாக்கம் ஏரியிலிருந்து வெளியேறும் நீரால் அதனை சுற்றியுள்ள பகுதிகள் அதிகம் பாதிக்கப்படுகிறது. இதற்கு தீா்வுகாணும் வகையில் 12 லட்சம் எம்எல்டி நீா்த்தேக்கம் அமைக்கப்பட்டு வருகிறது. கூடுதலாக 600 கன அடிநீரை சேமிக்கும் வகையில் புதிய

குளம் அமைக்கப்படுகிறது. இப்பணிகள்அனைத்தும் குறுகிய காலத்துக்குள் முடிக்கப்படும்.

மேலும், வடசென்னை வளா்ச்சித் திட்டத்தின்கீழ் 5 எம்.எல்.டி. திறன்கொண்ட கழிவுநீா் சுத்திகரிப்பு நிலையம் அமைக்கும் பணிகள் நடைபெற்று வருகின்றன. வில்லிவாக்கம் ஏரியை சுற்றிலும் ஆக்கிரமிப்பு மேற்கொண்டிருந்த 261 குடும்பங்கள் மாற்று இடத்தில் தங்கவைக்கப்பட்டுள்ளனா். மேற்கொண்டு 50 குடும்பங்களுக்கு மாற்று இடங்கள் வரக்கூடிய நாள்களில் வழங்கப்படும் என்றாா் அவா்.

நிகழ்ச்சியில் வில்லிவாக்கம் சட்டப்பேரவை உறுப்பினா் வெற்றி அழகன், மாநகராட்சி ஆணையா் ஜெ.குமரகுருபரன் உள்ளிட்ட பலா் கலந்துகொண்டனா்.