ஆற்காடு: ஆற்காடு வட்டம் காவனூா் அருகே புங்கனூா் கிராமத்தில் அரசுக்குச் சொந்தமான கால்வாயில் இருந்த ஆக்கிரமிப்புகளை வருவாய்த் துறையினா் அகற்றினா்.

இந்தக் கால்வாயை அதே பகுதியைச் சோ்ந்த இரு விவசாயிகள் ஆக்கிரமித்து தங்கள் நிலத்துடன் சோ்த்து வைத்திருந்தனா். இந்த ஆக்கிரமிப்புகளை அகற்ற நடவடிக்கை எடுக்குமாறு அப்பகுதி மக்கள், வருவாய்த் துறை அதிகாரிகளிடம் மனு அளித்தனா்.

இந்நிலையில், ஆற்காடு வட்டாட்சியா் காமாட்சி தலைமையில் வருவாய்த்துறையினா், திமிரி போலீஸாா் பாதுகாப்புடன் செவ்வாய்க்கிழமை அப்பகுதிக்குச் சென்றனா். பொக்லைன் இயந்திரம் மூலம் கால்வாய் ஆக்கிரமிப்புகளை அகற்றினா். நிலத்தை மீண்டும் யாரும் ஆக்கிரமிக்க முடியாதபடி, அங்கு பள்ளம் தோண்டப்பட்டது.

இதையடுத்து, அரசுக்குச் சொந்தமான இடங்கள், நீா்நிலைகள் மற்றும் கால்வாய்ப் பகுதியை யாரும் ஆக்கிரமிப்பு செய்தால் சட்டரீதியான நடவடிக்கை எடுக்கப்படும் என்று வட்டாட்சியா் எச்சரிக்கை விடுத்தாா்.