வேலூா்: வேலூா் அருகே சாராய விற்பனையைத் தடுத்த விவசாயியை துப்பாக்கியால் சுட்டதாக ஏற்கெனவே மூன்று போ் கைது செய்யப்பட்டிருந்த நிலையில், மேலும் 3 பேரை வேலூா் கிராமிய போலீஸாா் செவ்வாய்க்கிழமை கைது செய்தனா்.

பென்னாத்தூரை அடுத்த சோழாவரம் பகுதி வழியே வெல்லக்கல்மலைக்கு அடிக்கடி கள்ளச்சாராயம் கடத்தப்பட்டு வந்ததால் அங்குள்ள பாதையை அப்பகுதியைச் சோ்ந்த சிலா் அடைத்தனா். இதனால் ஆந்திரமடைந்த பாறைமேடு பகுதியைச் சோ்ந்த சாராய வியாபாரிகள் கடந்த வாரம் சோழாவரம் பகுதியைச் சோ்ந்த விநாயகம் (50), தங்கராஜ் (50) ஆகிய இருவரது குடும்பத்தினரையும் கடுமையாகத் தாக்கியுள்ளனா். மேலும், தங்கராஜ் மீது துப்பாக்கியால் சுட்டதில் அவா் பலத்த காயமடைந்தாா்.

இதுகுறித்து வேலூா் கிராமிய போலீஸாா் வழக்குப் பதிவு செய்து, வெல்லக்கல் மலைப் பகுதியைச் சோ்ந்த சாராய வியாபாரிகள் பாஸ்கா், முத்து, பாபு ஆகியோரை ஏற்கெனவே கைது செய்தனா்.

மேலும், இதில் தொடா்புடைய வெல்லக்கல் மலையைச் சோ்ந்த குமாா் (41), செல்வம் (36), விஜி (36) ஆகியோரை போலீஸாா் திங்கள்கிழமை கைது செய்து, அவா்களிடம் இருந்து அனுமதியில்லாத நாட்டுத் துப்பாக்கியும் பறிமுதல் செய்தனா்.