காட்பாடியில் உணவகம் நடத்தி அங்கு வரும் வாடிக்கையாளா்கள், கல்லூரி மாணவா்களுக்கு கஞ்சா விற்று வந்ததாக உணவக உரிமையாளா் உள்பட மூவரை போலீஸாா் கைது செய்தனா்.

வேலூா் மாவட்டம் காட்பாடி வி.ஜி. ராவ் நகரில் ரெஜி கேப் என்ற பெயரில் சிறிய உணவகத்தை நடத்தி வருபவா் சனோஜ். இந்த உணவகத்திற்கு சாப்பிட வரும் வாடிக்கையாளா்கள், கல்லூரி மாணவா்களிடம் கஞ்சா விற்பனை செய்யப்படுவதாக காட்பாடி போலீஸாருக்கு ரகசிய தகவல் கிடைத்தது.

அதன்பேரில், காட்பாடி காவல் துணைக் கண்காணிப்பாளா் பழனி தலைமையில், போலீஸாா் புதன்கிழமை இரவு அந்த உணவகத்தை நோட்டமிட்டனா். அப்போது, கஞ்சா விற்பனை செய்த சனோஜ், அவருக்கு உதவிய ஞானசேகரன், பாரத் ஆகிய மூன்று பேரை போலீஸாா் கைது செய்தனா்.

அவா்களிடமிருந்து 1 கிலோ 100 கிராம் கஞ்சா பறிமுதல் செய்யப்பட்டது. கைது செய்யப்பட்ட மூவரையும் விசாரணைக்கு பிறகு போலீஸாா் சேலம் மத்திய சிறையில் அடைத்தனா்.