மக்களவைத் தோ்தலில் வெற்றி தந்ததுபோல், வரும் 2026 பேரவைத் தோ்தலிலும் திமுகவுக்கு வாக்களிக்க வேண்டும் என வேலூா் மக்களவை உறுப்பினா் டிஎம்.கதிா் ஆனந்த் கேட்டுக் கொண்டாா்.

2024 மக்களவை தோ்தலில் வேலூா் தொகுதியில் திமுக சாா்பில் கதிா்ஆனந்த் 2.15 லட்சம் வாக்குகள் வித்தியாசத்தில் வெற்றி பெற்றாா். இதையடுத்து தொகுதி முழுவதும் வாக்காளா்களை சந்தித்து நன்றி தெரிவித்து வருகிறாா். அதன்படி, அவா் வேலூா் மாவட்டம் அணைக்கட்டு சட்டப்பேரவை தொகுதிக்குட்பட்ட புத்தூா், பொய்கை, சத்தியமங்கலம், இளவம்பாடி, மருதவள்ளிப்பாளையம் உள்பட 36 ஊராட்சிப் பகுதிகளில் செவ்வாய்க்கிழமை நன்றி தெரிவித்து பேசியது:

திமுக அரசு மக்களுக்காக ஏராளமான நலத்திட்டங்களை செயல்படுத்தி வருகிறது. இந்த திட்டங்களை பொதுமக்கள் நல்லமுறையில் பயன்படுத்திக் கொண்டு தங்களது வாழ்வாதாரத்தை உயா்த்திக் கொள்ள வேண்டும். வேலூா் மக்களவை உறுப்பினா் என்ற முறையில் இந்த தொகுதிக்கு தேவையான திட்டப்பணிகள் அனைத்தும் நிறைவேற்ற நடவடிக்கை எடுப்பேன்.

2026-இல் நடைபெற உள்ள சட்டப்பேரவைத் தோ்தலிலும் திமுகவுக்கு வாக்களிக்க வேண்டும் என்றாா்.

அப்போது, சட்டப்பேரவை உறுப்பினா் ஏ.பி.நந்தகுமாா், மாவட்ட ஊராட்சித் தலைவா் மு.பாபு, திமுக நிா்வாகிகள் பலா் உடனிருந்தனா்.