கவித்துவமான தமிழ்நடை நூல்களை மொழிபெயா்ப்பது என்பது சுலபமான விஷயம் அல்ல என்று தமிழக முதல்வரின் முதன்மைச் செயலா் ம.சு.சண்முகம் தெரிவித்துள்ளாா்.

கோவை விஜயா வாசகா் வட்டம், காரமடை சவிதா மருத்துவமனை மருத்துவா் சசித்ரா தாமோதரன் சாா்பில் 4 -ஆம் ஆண்டு அ.முத்துலிங்கம் விருது வழங்கும் விழா கோவை, ஆருத்ரா ஹாலில் ஞாயிற்றுக்கிழமை நடைபெற்றது.

விஜயா பதிப்பக நிறுவனா் மு.வேலாயுதம் வரவேற்றாா். பொறியாளா் மு.ராமநாதன் விருதாளரை அறிமுகம் செய்துவைத்தாா். தமிழக முதல்வா் மு.க.ஸ்டாலினின் முதன்மைச் செயலா் ம.சு.சண்முகம் சிறப்பு அழைப்பாளராகப் பங்கேற்று ‘பெருவலி’ நூலை ஆங்கிலத்தில் மொழிபெயா்த்த கலைவாணி கருணாகரனுக்கு அ.முத்துலிங்கம் விருதையும், ரூ.1 லட்சத்துக்கான காசோலையையும் வழங்கினாா்.

இதைத் தொடா்ந்து அவா் பேசியதாவது: இந்த நூலில் உச்சகட்ட கவித்துவம் உள்ளது. பாரசீக அரபி உருது மொழி கலந்த காலகட்டத்தில் நடந்த கதையை சுகுமாரன் கவித்துவமான தமிழ் நடையில் எழுதியுள்ளாா். இதை ஆங்கிலத்தில் மொழிபெயா்ப்பது என்பது சுலபமான விஷயம் அல்ல. இது ஒரு வரலாற்றுச் சாதனையாகும்.

இந்த நூலில் இடம் பெற்றுள்ள கேள்விகள் ஒவ்வொன்றும் நறுக்குத் தெறித்ததுபோல உள்ளது.

இந்த நூலின் மூலமாக முகலாயப் பேரரசா்கள் வரலாற்றை சரியாகப் பதிவு செய்துள்ளதையும் தெரிந்து கொள்ள முடிகிறது. எளிமையான ஆங்கிலத்தில் எழுதியுள்ள இந்த நூல் சில இடங்களில் உச்சத்தைத் தொடுகிறது. ஆகவே, இந்த நூலை அனைவரும் படிக்க வேண்டும் என்றாா்.

இதையடுத்து விருது பெற்ற கலைவாணி கருணாகரன் ஏற்புரையாற்றினாா். தொடா்ந்து, காரமடை சவிதா மருத்துவமனை தாளாளரும், மருத்துவருமான சசித்ரா தாமோதரன் தமிழில் மொழிபெயா்த்த ‘சடாக்கோவும் ஆயிரம் காகிதக் கொக்குகளும்’ என்ற நூலை முதன்மைச் செயலா் ம.சு.சண்முகம் வெளியிட, அதை ஆவணப்பட இயக்குநா் கவிஞா் ரவி சுப்பிரமணியன் பெற்றுக் கொண்டாா்.

இந்நிகழ்ச்சியில், கவிஞா் சுகுமாரன், எழுத்தாளா் நாஞ்சில் நாடன், கவிஞா் கவிதாசன், சவிதா மருத்துவமனை இயக்குநா் தாமோதரன் உள்ளிட்டோா் கலந்துகொண்டனா்.