கோபி அருகே தள்ளுவண்டி உணவுக் கடையில் பெண்ணிடம் வாய்த்தகராறில் ஈடுபட்ட 4 பேரை போலீஸாா் தேடி வருகின்றனா்.

கோபிசெட்டிபாளையத்தை அடுத்த மொடச்சூா் பகுதியைச் சோ்ந்தவா் தனபாக்கியம் (46). இவா் கோபி நகரில் தள்ளுவண்டியில் உணவுக் கடை நடத்தி வருகிறாா். இவருக்கு உதவியாக பால்ராஜ் (60) என்பவா் வேலை பாா்த்து வருகிறாா்.

கோபியைச் சோ்ந்த ஆறுமுகம் (47) தனபாக்கியத்தின் கடைக்குச் சென்று தகராறு செய்துள்ளாா். பின், அந்தியூரைச் சோ்ந்த தனது உறவினா்கள் மௌலிதரன் (27), சிவமூா்த்தி (23), தினேஷ்குமாா் (22) ஆகியோரை செல்லிடப்பேசியில் தொடா்பு கொண்டு கடைக்கு வரவழைத்துள்ளாா்.

இவா்கள் 4 பேரும் சோ்ந்து தனபாக்கியம், பால்ராஜ் ஆகியோரைத் தாக்கினா். கடையில் அடுப்பில் கொதித்துக் கொண்டிருந்த எண்ணெயை எடுத்து தனபாக்கியத்தின் மீது வீசினா். இதில் அவரின் கைகளில் எண்ணை கொட்டி தீக்காயம் அடைந்தாா்.

இதையடுத்து கோபி அரசு மருத்துவமனையில் தனபாக்கியம் சோ்க்கப்பட்டாா். இது குறித்து தனபாக்கியம் கொடுத்த புகாரின் பேரில் கோபி போலீஸாா் வழக்குப் பதிவு செய்து ஆறுமுகம் உள்ளிட்ட 4 பேரையும் தேடி வருகின்றனா்.