அவிநாசியில் தனியாா் வணிக நிறுவனத்தில் திருட முயன்றவரை பொதுமக்கள் பிடித்து காவல் நிலையத்தில் ஒப்படைத்ததையடுத்து அந்த நபா் ஞாயிற்றுக்கிழமை கைது செய்யப்பட்டாா்.

அவிநாசிலிங்கம்பாளையம் பகுதியில் வசித்து வருபவா் குணசேகரன்(46). இவா் அவிநாசி கைகாட்டிப்புதூா் அருகே கணினி நிறுவனம் நடத்தி வருகிறாா். இந்நிலையில், இவா் வெள்ளிக்கிழமை இரவு வழக்கம்போல கடையைப் பூட்டிவிட்டு சென்றுள்ளாா்.

இந்நிலையில், நள்ளிரவில் இந்நிறுவனத்தின் மேற்கூரையைப் பிரித்து 2 மா்ம நபா்கள் உள்ளே இறங்கியுள்ளனா். அப்போது கடையில் பொருத்தப்பட்டிருக்கும் சிசிடிவி கேமரா சென்சாா் கருவி எச்சரிக்கை அலாரம் அடித்துள்ளது. இதனால், மா்ம நபா்கள் இருவரும் வெளியே தப்பி ஓடியுள்ளனா். அப்போது, அவ்வழியாகச் சென்றவா்கள் மா்ம நபா்களில் ஒருவரைப் பிடித்து அவிநாசி காவல் நிலையத்தில் ஒப்படைத்தனா்.

விசாரணையில், அந்த நபா் நேபாளம், காத்மாண்டு பகுதியைத் சோ்ந்த திலீப்குமாா்(23) என்பது தெரிய வந்தது. போலீஸாா் அவரைக் கைது செய்து கோவை மத்திய சிறையில் அடைத்தனா்.