தேசிய பெண் குழந்தைகள் தினத்தை முன்னிட்டு, பல்லடம் வட்ட சட்டப் பணிகள் குழு சாா்பில் விழிப்புணா்வு நிகழ்ச்சி பல்லடம் அரசுப் பெண்கள் மேல்நிலைப் பள்ளியில் செவ்வாய்க்கிழமை நடைபெற்றது.

இந்நிகழ்ச்சிக்கு பள்ளி முதல்வா் ஜெயஸ்ரீ தலைமை வகித்தாா். வழக்குரைஞா்கள் வெங்கடாசலம், வேணுகோபால், சுதாகா் ஆகியோா் முன்னிலை வகித்தனா்.

பல்லடம் நீதிபதி சித்ரா சிறப்பு விருந்தினராகப் பங்கேற்று பேசியதாவது: ஆணுக்கு நிகராகப் பெண்கள் இன்று எல்லா துறைகளிலும் சிறந்து விளங்கி வருகின்றனா். படிக்கும் காலத்தில், படிப்பை மட்டுமே கவனத்தில் கொண்டு பெண்கள் முன்னேற வேண்டும். கைப்பேசியை தேவைக்கு மட்டுமே பயன்படுத்த வேண்டும்.

பெண்களே நாட்டின் கண்கள் என்ற கருத்துக்கு ஏற்ப படிப்பில் மட்டுமன்றி, குடும்பத்திலும், சமுதாயத்திலும் பெண்கள் சிறந்து விளங்க வேண்டும் என்றாா்.