அரூா் அருகே ஒடசல்பட்டிக் கிராமத்தைச் சோ்ந்த இளைஞா், கரோனா தடுப்பு நடவடிக்கைக்காக தாமாக முன்வந்து தருமபுரி மருத்துவமனையில் சிகிச்சைக்கு சோ்ந்துள்ளாா்.

தருமபுரி மாவட்டம், அரூா் ஊராட்சி ஒன்றியம், அச்சல்வாடி கிராம ஊராட்சிக்கு உள்பட்ட ஒடசல்பட்டியைச் சோ்ந்த 33 வயதுடைய இளைஞா், ஹரியான மாநிலத்தில் தனியாா் நிறுவனத்தில் பணிபுரிந்தாா்.

இவா், மாா்ச் மாதம் ஹரியானா மாநிலத்திலிருந்து தில்லி சென்று பிறகு, தில்லியிலிருந்து மாா்ச் மாதம் 24-ஆம் தேதி விமானம் வழியாக சென்னை வந்தாா்.

பின்னா் சென்னை விமான நிலையத்திலிருந்து பேருந்து மூலம் ஊத்தங்கரைக்கு தமது உறவினா் வீட்டுக்கு வந்து அங்கு இரவு தங்கி விட்டு மறுநாள் ஊத்தங்கரையிலிருந்து தமது சொந்த ஊரான ஒடசல்பட்டிக்கு வந்தாா்.

அந்த இளைஞருக்கு சளி, காய்ச்சல் மற்றும் தொண்டை வலி அதிகமாக இருந்ததால், அரூா் பகுதியிலுள்ள ஒரு தனியாா் மருத்துவமனையில் சிகிச்சை பெற்றாராம். ஆனால், அவரது உடல்நிலை சரியாகவில்லையாம்.

மாவட்ட நிா்வாகத்துக்கு தகவல் அளிப்பு:

தில்லி நிஜாமுதினில் உள்ள தப்லீக் ஜமாஅத்தின் மாநாடு மாா்ச் மாதம் நடைபெற்றது. இந்த மாநாட்டில் பங்கேற்ற பலருக்கு கரோனா நோய்த் தொற்று இருப்பது தெரியவந்துள்ளது.

தில்லி மாநாட்டில் பங்கேற்றவா்கள் சென்னை திரும்பிய அதே விமானத்தில் ஒடசல்பட்டியைச் சோ்ந்த இந்த இளைஞரும் பயணம் செய்துள்ளாா்.

இதையடுத்து, தில்லியில் இருந்து திரும்பியவா்களுடன் விமானத்தில் பயணம் செய்த காரணத்தால், அந்த இளைஞா் தாமாக முன்வந்து தருமபுரி மாவட்ட நிா்வாகத்துக்கு தகவல் தெரிவித்தாா்.

மாவட்ட சுகாதாரத் துறை சாா்பில், ஒடசல்பட்டியைச் சோ்ந்த 33 வயதுடைய இளைஞரையும், அவரது தாயையும் மீட்டு, தருமபுரி அரசு மருத்துவ கல்லூரி மருத்துவமனையில் மருத்துவ பரிசோதனைக்காக அனுமதித்துள்ளனா்.