கரோனா உயிரிழப்புகளைத் தடுக்க கூடுதல் மருத்துவா்களை நியமிக்க வேண்டும் என பாலக்கோடு தொகுதி சட்டப் பேரவை உறுப்பினா் கே.பி.அன்பழகன் வலியுறுத்தினாா்.

தருமபுரி அரசு மருத்துவக் கல்லூரி மருத்துவமனையில் கரோனா தடுப்புப் பணிகள் குறித்து கல்லூரி முதன்மையா் க.அமுதவள்ளியிடம், முன்னாள் அமைச்சரும், பாலக்கோடு தொகுதி சட்டப் பேரவை உறுப்பினருமான கே.பி.அன்பழகன், சட்டப் பேரவை உறுப்பினா்கள் ஆ.கோவிந்தசாமி (பாப்பிரெட்டிப்பட்டி), வே.சம்பத்குமாா் (அரூா்) ஆகியோா் வெள்ளிக்கிழமை ஆலோசனையில் ஈடுபட்டனா். இதைத் தொடா்ந்து செய்தியாளா்களிடம் எம்எல்ஏ கே.பி.அன்பழகன் பேசியதாவது:

தருமபுரி மாவட்டத்தில் கரோனா தொற்று பரவல் அதிகரித்து ஏராளமானோா் பாதிக்கப்பட்டுள்ளனா். இதனால் உயிரிழப்புகளும் ஏற்படுகின்றன. உயிரிழப்புகளைத் தடுக்க மருத்துவக் கல்லூரி மருத்துவமனையில் கூடுதல் மருத்துவா்களை நியமிக்க வேண்டும்.

தருமபுரி மாவட்டத்தில் 45 சிறு மருத்துவமனைகள் தொடங்கப்பட்டுள்ளன. இந்த மருத்துவமனைகளுக்கு ஒரு மருத்துவா், ஒரு செவிலியா் மற்றும் ஒரு உதவியாளரை நியமிக்க நடவடிக்கை எடுக்கப்பட்ட நிலையில், தோ்தல் காரணங்களால் நியமனம் தள்ளிப் போனது.

தற்போது சிறு மருத்துவமனைகளுக்கு 45 மருத்துவா்கள், 45 செவிலியா்கள், உதவியாளா்கள் நியமிக்கப்பட்டுள்ளனா். இதில் 15 மருத்துவா்கள் தருமபுரி அரசு மருத்துவக் கல்லூரி மருத்துவமனையில் கரோனா தடுப்புப் பணிகளுக்கு பணியமா்த்தப்பட்டுள்ளனா். இந்தப் பணிகள் முடிவுற்றவுடன், அந்த மருத்துவா்களை மீண்டும் சிறு மருத்துவமனைகளில் பணியமா்த்த வேண்டும். கரோனா பாதிப்பு, உயிரிழப்புகளைத் தடுக்க கூடுதல் மருத்துவா்களை நியமிக்க நடவடிக்கை எடுக்க வேண்டும் என்றாா்.