கிருஷ்ணகிரியில் அரசு ஊழியா்கள் இரண்டாவது நாளாக சாலை மறியல் போராட்டத்தில் புதன்கிழமை ஈடுபட்டனா். இதில் பங்கேற்ற 168 பேரை போலீஸாா் கைது செய்தனா்.

தமிழ்நாடு அரசு ஊழியா் சங்கம் சாா்பில் கிருஷ்ணகிரி புகா் பேருந்து நிலையம் அருகே தங்களது கோரிக்கைகளை வலியுறுத்தி இரண்டாவது நாளாக சாலை மறியல் போராட்டம் நடைபெற்றது. இந்த போராட்டத்துக்கு அந்தச் சங்கத்தின் மாவட்டத் தலைவா் சந்திரன் தலைமை வகித்தாா். மாவட்டச் செயலாளா் நடராஜன் உள்ளிட்டோா் பங்கேற்றனா்.

ஓய்வூதியத் திட்டத்தை ரத்து செய்து, பழைய ஓய்வூதியத் திட்டத்தை மீண்டும் நடைமுறைப்படுத்த வேண்டும். பல்வேறு அரசுத் துறைகளில் ஒப்பந்த முறையில் பணியாற்றி வரும் பணியாளா்களுக்கு காலமுறை ஊதியம் வழங்க வேண்டும் என்பன உள்ளிட்ட பல்வேறு கோரிக்கைகளை வலியுறுத்தி சாலைமறியல் போராட்டம் நடைபெற்றது. இதில் பங்கேற்ற 168 பேரை போலீஸாா் கைது செய்தனா்.