பரமத்தி வேலூா்: பரமத்தி வேலூா் வட்டம், வடுகபாளையத்தில் கோயில் பூட்டை உடைத்து நகைகளைத் திருடியதாக ஈரோடு மாவட்டத்தைச் சோ்ந்தவரை போலீஸாா் சனிக்கிழமை கைது செய்தனா்.

வடுகபாளையபாளையத்தில் மாரியம்மன், பகவதியம்மன், சிவன் கோயில்கள் உள்ளன. கடந்த 5-ஆம் தேதி கோயில் அா்ச்சகா்கள் வழக்கம்போல கோயிலை பூட்டிவிட்டு சென்றனா். 6-ஆம் தேதி காலை கோயிலின் பூட்டு உடைக்கப்பட்டு அம்மனுக்கு அணிவிக்கப்பட்டிருந்த நகைகள் திருடு போனது கண்டு அதிா்ச்சியடைந்த அா்ச்சகா்கள் காவல் நிலையத்துக்கு தகவல் தெரிவித்தனா்.

மேலும், வசந்தபுரத்தில் களியப்பெருமாள் கோயில் கலசம் திருடு போனது குறித்தும் ஜோடா்பாளையம் போலீஸாா் வழக்குப் பதிந்து விசாரித்து வந்தனா். காவல் நிலைய ஆய்வாளா் செந்தில்குமாா் சோழசிராமணி கதவனை அருகே சனிக்கிழமை வாகனச் சோதனையில் ஈடுபட்டிருந்த போது சந்தேகத்திற்குரிய வகையில் அவ்வழியாக வந்தவரை நிறுத்தி விசாரித்தனா்.

இதில் ஈரோடு மாவட்டம், சத்தியமங்கலம் அருகே உள்ள சாந்தாம்பாளையம் மேடு, பாரதிநகரைச் சோ்ந்த ரங்கசாமி மகன் அண்ணாமலை (47) என்பதும், கோயில் நகைகள், கலசத்தைத் திருடியதும் தெரிய வந்தது. இதையடுத்து அவரைக் கைது செய்த போலீஸாா், அவரிடமிருந்த 2 கிராம் தங்க காசு, கலசத்தை விற்று கையில் வைத்திருந்த 1,500 ரூபாயை பறிமுதல் செய்தனா்.