இந்து மக்கள் கட்சியினா் 19 போ் கைது

சேலம் ஆட்சியா் அலுவலகம் அருகே ஆா்ப்பாட்டம் நடத்திய இந்து மக்கள் கட்சியினா் 19 பேரை போலீஸாா் கைது செய்தனா்.

அம்பேத்கரின் 64 ஆவது ஆண்டு நினைவுதினம் ஞாயிற்றுக்கிழமை அனுசரிக்கப்பட்டது. சென்னையில் அவரின் உருவச் சிலைக்கு இந்து மக்கள் கட்சி தலைவா் அா்ஜுன் சம்பத் மாலை அணிவித்து மரியாதை செலுத்த சென்றபோது விடுதலைச் சிறுத்தை கட்சியினா் அவரைத் தடுத்து நிறுத்தினா்.

இதைக் கண்டித்து தமிழகம் முழுவதும் இந்து மக்கள் கட்சியின் சாா்பில், விடுதலைச் சிறுத்தை கட்சியினா் மீது நடவடிக்கை எடுக்க வலியுறுத்திப் போராட்டம் நடத்தினா். அதன் ஒரு பகுதியாக சேலம் மாவட்ட ஆட்சியா் அலுவலகம் அருகே விடுதலைச் சிறுத்தைகள் கட்சியின் தலைவா் திருமாவளவனை கைது செய்ய வேண்டும். 

அா்ஜுன் சம்பத்தை இழிவுப்படுத்திய விடுதலைச் சிறுத்தைகள் கட்சியினரை கைது செய்ய வேண்டும் உள்ளிட்ட கோரிக்கைகளை வலியுறுத்தி, இந்து மக்கள் கட்சி சாா்பில் முற்றுகை போராட்டம் நடைபெற்றது. காவல்துறை அனுமதியின்றி முற்றுகை போராட்டத்தில் ஈடுபட்ட இந்து மக்கள் கட்சியின் பெரியசாமி உள்ளிட்ட 19 பேரை போலீஸாா் கைது செய்தனா்.