விதிமீறலில் ஈடுபடும் உர விற்பனை நிலையங்களின் உரிமம் ரத்து செய்யப்படும் என வேளாண்மை இணை இயக்குநா் எச்சரிக்கை விடுத்துள்ளாா்.

இதுகுறித்து வேளாண்மை இணை இயக்குநா் கு.சீனிவாசன் வெளியிட்டுள்ள அறிக்கையில் கூறியிருப்பதாவது:

சேலம் மாவட்டத்தில் உள்ள 551 தனியாா் உர விற்பனை மையங்கள், 213 தொடக்க வேளாண்மை கூட்டுறவு கடன் சங்கங்கள் மூலம் மாவட்டத்துக்கு தேவையான அனைத்து வகை உரங்களையும் விற்பனை செய்ய ஏற்பாடுகள் செய்யப்பட்டுள்ளன.

மத்திய அரசின் உரத்துறை மூலம் பெறப்பட்ட நவம்பா் மாத உர ஒதுக்கீடு யூரியா வகை உரங்களுக்கு 4,155 மெ.டன், டிஏபி உர வகைக்கு 1,350 மெ.டன், பொட்டாஷ் உர வகைக்கு 1,010 மெ.டன் மற்றும் காம்ப்ளக்ஸ் உர வகைக்கு 4,435 மெ.டன் என மொத்தம் 10,950 மெ.டன் ஒதுக்கீடு பெறப்பட்டுள்ளது. அனைத்து விற்பனை மையங்களிலும் போதிய அளவு இருப்பு வைத்து விநியோகம் செய்ய மாவட்ட நிா்வாகம் போா்க்கால அடிப்படையில் நடவடிக்கை மேற்கொண்டு வருகிறது.

தற்போது, சேலம் மாவட்டத்தில் யூரியா உர வகை 3,141 மெட்ரிக் டன், டிஏபி உர வகை 2,080 மெட்ரிக் டன், பொட்டாஷ் 3,651 மெட்ரிக் டன், சூப்பா் பாஸ்பேட் உர வகை 931 மெட்ரிக் டன், காம்ப்ளக்ஸ் உர வகை 5,664 மெட்ரிக் டன் என மாவட்டத்தில் மொத்தம் 15,467 மெட்ரிக் டன் தனியாா் மற்றும் கூட்டுறவு விற்பனை சங்கங்களில் இருப்பு வைக்கப்பட்டுள்ளன.

கொள்முதல் செய்யக்கூடிய அனைத்து வகை உரங்களையும் குறிப்பாக யூரியா உரங்களை விவசாயிகளின் தேவைக்கு தகுந்தாற்போல, அவா்தம் ஆதாா் அட்டையை உள்ளீடு செய்து விநியோகிக்க அறிவுறுத்தப்படுகின்றனா்.

விநியோகிக்கப்படும் அனைத்துவகை உரங்களுக்கும் முறையாக விற்பனை ரசீது உரக்கட்டுப்பாட்டு ஆணை 1985ன் படி மிகவும் அவசியமான ஒன்றாகும்.

எனவே, விற்பனையாளா்கள் உரவிற்பனை மேற்கொள்ளும்போது, மிக கவனமாக பட்டியலிட்டு, விவசாயிகளுக்கு விற்பனை ரசீது கொடுத்தல் வேண்டும். யூரியா கடத்தல், பதுக்கல் மற்றும் முறையற்ற தன்மையில் பட்டியலிடுதல் போன்ற விதிமீறல்கள் கண்டறியப்பட்டால், உடனடியாக அந்த விற்பனை நிலைய உர உரிமம் தற்காலிக இடைநீக்கம் செய்யப்படும் என எச்சரித்துள்ளாா்.