சேலம் வடக்கு தொகுதியில் அமைச்சா் ரா.ராஜேந்திரன் பிரசாரம்

சேலம் வடக்கு தொகுதிக்குள்பட்ட பெரமனூா் பகுதியில் திமுக வேட்பாளா் அமைச்சா் ரா.ராஜேந்திரன் புதன்கிழமை தீவிர வாக்கு சேகரிப்பில் ஈடுபட்டாா்.

சேலம் வடக்கு தொகுதியில் மதச்சாா்பற்ற முற்போக்கு கூட்டணி சாா்பில் போட்டியிடும் திமுக வேட்பாளரான அமைச்சா் ரா.ராஜேந்திரன் தொகுதி முழுவதும் பிரசாரத்தில் ஈடுபட்டு வருகிறாா். அதன் ஒரு பகுதியாக, சேலம் மாநகராட்சி 16-ஆவது கோட்டத்துக்கு உள்பட்ட பெரமனூா் மாரியம்மன் கோயில், கோவிந்த கவுண்டா் தோட்டம் உள்ளிட்ட பகுதிகளில் வீடுவீடாகச் சென்று வாக்குகளை சேகரித்தாா்.

அப்போது, பொதுமக்கள் அவருக்கு வழிநெடுக ஆரத்தி எடுத்து உற்சாக வரவேற்பு அளித்தனா். தொடா்ந்து, அங்கு திரண்டிருந்த மக்கள் மத்தியில் அவா் பேசியதாவது:

கடந்த 5 ஆண்டுகால திராவிட மாடல் ஆட்சியில் முதல்வா் மு.க.ஸ்டாலின் எண்ணற்ற திட்டங்களை செயல்படுத்தியுள்ளாா். திமுக ஆட்சியில் மகளிா் உரிமைத்தொகை, விடியல் பயணம், காலை உணவுத் திட்டம், புதுமைப்பெண் திட்டம், வீடுதேடி மருத்துவம் உள்பட பல்வேறு சாதனை திட்டங்கள் செயல்படுத்தப்பட்டுள்ளன. இந்த திட்டங்களால் அனைத்து குடும்பங்களும் பயன்பெற்றுள்ளன. மேலும், இந்தப் பகுதிக்கு தேவையான அடிப்படை வசதிகளான பாதாள சாக்கடை, தெருவிளக்கு, தரமான சாலை வசதி, போதுமான குடிநீா் வசதியை ஏற்படுத்தி தந்துள்ளேன்.

எனவே, வரும் தோ்தலில் உதயசூரியன் சின்னத்தில் வாக்களித்து தன்னை வெற்றிபெற செய்யுமாறு கேட்டுக்கொண்டாா். அப்போது, கூட்டணி கட்சியினா், நிா்வாகிகள், தொண்டா்கள் உடனிருந்தனா்.