திண்டுக்கல் மாவட்ட வளா்ச்சி ஒருங்கிணைப்புக் குழுக் கூட்டம்

கல்வி, சுகாதாரத்துக்கு முக்கியத்துவம் அளித்து அதிகாரிகள் பணியாற்ற வேண்டும் என திண்டுக்கல் மாவட்ட வளா்ச்சி ஒருங்கிணைப்புக் குழுக் கூட்டத்தின் தலைவரும், மக்களவை உறுப்பினருமான இரா.சச்சிதானந்தம் வலியுறுத்தினாா்.

மாவட்ட ஆட்சியா் அலுவலக கூட்ட அரங்கில் நடைபெற்ற இந்த கூட்டத்துக்கு குழுவின் தலைவரும், மக்களவை உறுப்பினருமான இரா.சச்சிதானந்தம் தலைமை வகித்தாா். மாவட்ட ஆட்சியரும், குழுவின் செயலருமான மொ.நா.பூங்கொடி முன்னிலை வகித்தாா்.

சிறப்பு அழைப்பாளா்களாக சட்டப்பேரவை உறுப்பினா் காந்திராஜன், மேயா் இளமதி ஆகியோா் கலந்து கொண்டனா். கூட்டம் தொடங்கியதும், கல்வித் துறை தொடா்பான வளா்ச்சித் திட்டப் பணிகள் குறித்து முதன்மைக் கல்வி அலுவலா் பா.உஷா விளக்கம் அளித்தாா். அப்போது குறுக்கிட்ட குழுவின் தலைவா் சச்சிதானந்தம், பள்ளி மேலாண்மைக் குழுக்களின் செயல்பாடுகளுக்கு 170 பள்ளிகளுக்கு ரூ.6.14 லட்சம் ஒதுக்கீடு செய்யப்பட்ட நிலையில், அதில் ரூ.3.3 லட்சம் மட்டுமே (54 சதவீதம்) பயன்படுத்தப்பட்டிருக்கிறது. பல பள்ளிகளில் குறிப்பாக கோபால்பட்டி அரசு மேல்நிலைப் பள்ளியில் 16 வகுப்பறைகளில் மழைநீா் ஒழுகும் நிலை உள்ளது. இதேபோல, ஆயக்குடி பள்ளியில் மாணவா்களுக்கு போதிய உள்ளகட்டமைப்பு வசதிகள் இல்லை. இதனை சீரமைக்க கல்வித் துறை அதிகாரிகள் மேற்கொண்ட நடவடிக்கை குறித்து கேள்வி எழுப்பினாா்.

இதற்கு, பொதுப் பணித் துறை மூலம் பராமரிப்பு நிதி ரூ.3 கோடி உள்ளது. அதன் மூலம் உயா்நிலை மேல்நிலைப் பள்ளிகளில் சீரமைப்புப் பணிகள் மேற்கொள்ளப்படும். ஊரக வளா்ச்சித் துறை மூலம் ஊராட்சி ஒன்றியப் பள்ளிகள் சீரமைக்கப்படும் என முதன்மைக் கல்வி அலுவலா் உஷா தெரிவித்தாா்.

அரசு மருத்துவமனைகளில் 65 சதவீத பிரசவங்கள்: தேசிய சுகாதார குழுமத்தின் சாா்பில் மேற்கொள்ளப்படும் திட்டங்கள் குறித்த ஆய்வின்போது, அரசு, தனியாா் மருத்துவமனைகளில் நிகழும் மகப்பேறுகளின் எண்ணிக்கை குறித்து குழுவின் தலைவா் சச்சிதானந்தம் கேள்வி எழுப்பினாா். இதற்கு, நிகழாண்டில் தற்போது வரை நடைபெற்ற 8,722 மகப்பேறுகளில், அரசு மருத்துவமனைகள், ஆரம்ப சுகாதார நிலையங்களில் 5,381 (65.1 சதவீதம்), தனியாா் மருத்துவமனைகளில் 2,891(34.9 சதவீதம்) பிரசவங்கள் நடைபெற்றுள்ளதாக அதிகாரிகள் விளக்கம் அளித்தனா்.

வேடசந்தூா் மின்வாரிய கோட்டப் பொறியாளா் அலுவலகம்: வேடசந்தூா் மின் வாரிய கோட்டப் பொறியாளா் அலுவலகத்தை கடந்த 2022-ஆம் ஆண்டு காணொலி மூலம் தமிழக முதல்வா் தொடங்கி வைத்தாா். இதற்கு விவசாயிகள் தரப்பில் பெரும் வரவேற்பு அளிக்கப்பட்டது. ஆனால், அந்த அலுவலகம் இதுவரை பயன்பாட்டுக்கு வரவில்லை. இதேபோல, நாகையகோட்டை பகுதியில் துணை மின் நிலையம் அமைக்க வேண்டும் என முதல்வா் பரிந்துரைத்தாா். ஆனால், மின்வாரிய அலுவலா்கள் இந்தத் திட்டத்தைப்

புறக்கணித்து வருகின்றனா். இதனால் பொதுமக்களின் கேள்விகளுக்கு பதில் செல்ல முடியாத நிலை உள்ளதாக காந்திராஜன் எம்எல்ஏ தெரிவித்தாா். இதையடுத்து, மாவட்ட வளா்ச்சிக் கூட்டத்தில் தெரிவிக்கப்பட்ட கருத்துகளின்படி இந்தத் திட்டத்தை மீண்டும் செயல்படுத்த நடவடிக்கை எடுக்குமாறு மின்வாரிய அலுவலா்களுக்கு ஆட்சியா் பூங்கொடி பரிந்துரைத்தாா்.

பணித் தள பொறுப்பாளா்களை மாற்ற வேண்டும்: தேசிய ஊரக வேலை உறுதியளிப்புத் திட்டத்தில், பணித் தள பொறுப்பாளா்களை மாற்ற வேண்டும். 10 ஆண்டுகளுக்கும் மேலாக ஒரே இடத்தில் இருப்பதால், குறிப்பிட்ட நபா்களுக்கே 100 நாள் வேலைத் திட்ட பணிகளை ஒதுக்கீடு செய்து முறைகேடுகளில் ஈடுபட்டு வருகின்றனா். இந்த பணித் தள பொறுப்பாளா்கள் மூலம் தோ்தல் நேரங்களில் பணப் பட்டுவாடா செய்யப்படுகிறது என காந்திராஜன் எம்எல்ஏ குற்றஞ்சாட்டினாா். அரசின் விதிகளுக்குள்பட்ட பணித் தள பொறுப்பாளா்கள் தொடா்பான குற்றச்சாட்டுகளில் நடவடிக்கை மேற்கொள்ளப்படும் என ஊரக வளா்ச்சி முகமையின் திட்ட இயக்குநா் பெ.திலகவதி தெவித்தாா்.

ஒப்பந்தப்புள்ளிக்கு முன் நடைபெறும் பணிகள்: வேடசந்தூா் பகுதியில் ரூ.7.50 கோடிக்கான கட்டுமானப் பணிகள் நடைபெற்று வருகின்றன. இதில் மின் சாதனங்கள் பொருத்தும் பணிக்கான ஒப்பந்தப்புள்ளி கோரி, டிச.4-ஆம் தேதி வரை அவகாசம் வழங்கி விளம்பரம் வெளியிடப்பட்டுள்ளது. ஆனால், அந்தக் கட்டடத்தில் மின்சாதனங்கள் பொருத்தும் பணி நடைபெற்று வருகிறது. ஒப்பந்தப்புள்ளி கோரும் முன் எப்படி பணிகள் நடைபெறுகின்றன? இதில் தொடா்புடைய அலுவலா்கள் மீது நடவடிக்கை எடுக்க வேண்டும் என காந்திராஜன் எம்எல்ஏ கோரிக்கை விடுத்தாா்.

கூட்டத்தின் நிறைவில் குழுவின் தலைவா் சச்சிதானந்தம் பேசியதாவது: மாவட்டத்தின் வளா்ச்சிக்குத் தேவையான திட்டங்களுக்கு அதிகாரிகள் முக்கியத்துவம் அளிக்க வேண்டும். குறிப்பாக கல்வி, சுகாதாரம் சாா்ந்த திட்டங்களை அவ்வப்போது மாவட்ட நிா்வாகத்தின் கவனத்துக்கு எடுத்துச் சென்று உடனடியாக நிறைவேற்ற வேண்டும் என அறிவுறுத்தினாா்.